Toshkent shahar Yashnobod tumanidagi ko‘p qavatli uylardan birining yerto‘lasi o‘zboshimchalik bilan o‘zgartirilgani ma’lum bo‘ldi. Bu haqda Qurilish va uy-joy kommunal xo‘jaligi vazirligi xabar berdi.
Qayd etilishicha, qurilish va uy-joy kommunal xo‘jaligi vaziri o‘rinbosari Ozoda Jo‘rayeva Yashnobod tumani Tuzel-2 mavzesi “Vatandosh” MFY 12-b uyda istiqomat qiluvchi aholi murojaatlariga asosan o‘rganish ishlarini olib borgan.
Murojaatda 9 qavatdan iborat mazkur uyning yerto‘la qismida tadbirkorlar tomonidan noqonuniy ishlar amalga oshirib kelinayotgani aytilgan. Holat joyida o‘rganilganda, haqiqatan ham ko‘p qavatli uyning yerto‘lasi buzilib yotgani, hatto bino fundamenti o‘zgartirilayotgani aniqlangan. Mazkur noqonuniy qurilmalar bo‘yicha Qurilish va uy-joy kommunal sohasida nazorat inspeksiyasining uy-joy fondi va ichimlik suvidan foydalanishni nazorat qilish bo‘yicha mas‘ullari chaqirtirilib, mavjud holatni tezkorlik bilan o‘rganish vazifasi yuklatilgan.
Vazir o‘rinbosari, shuningdek, 12-b uy aholi vakillarining kommunal sohaga oid boshqa muammolarini ham tinglagan. O‘z navbatida fuqarolar uyda issiqlik tizimining yaxshi ishlamasligi aytilgan. Ozoda Jo‘rayeva poytaxtda holati yaxshi bo‘lmagan uylarning ichki tizimini to‘liq almashtirish bo‘yicha ishlar boshlab yuborilganini ma’lum qilgan.
“Bu yil Toshkent shahridagi 1 825 ta ichki tizimi nosoz, muammoli ko‘p kvartirali uyning kommunikatsiya tizimlari to‘liq yangilanishi rejalashtirilgan. Xususan, siz istiqomat qiluvchi hamda mahallangizdagi yana 4 ta uy ushbu ro‘yxatga kiritilgan. Bu bo‘yicha tez kunlarda ta‘mirlash ishlari boshlanadi. O‘zaro hamjihatlikda uyingizdagi barcha kommunal muammolarni bartaraf etilishiga erishamiz”, — deydi vazir o‘rinbosari.
Ta’kidlanishicha, uyning yerto‘la qismidagi qoidabuzarliklar inspeksiya tomonidan o‘rganilmoqda.
Kuni kecha Toshkent shahrining Shayxontohur tumanidagi ko‘pqavatli uy yerto‘lasi o‘zboshimchalik bilan o‘zgartirilgani aniqlangandi. Fuqaro loyiha hujjatlaridan chetga chiqqan holda binoning tayanch devorlari hamda kommunikatsiya tarmoqlari joylashuvini o‘zgartirgan. Inspeksiya tomonidan huquqbuzarga nisbatan tegishli tartibda maʼmuriy bayonnoma rasmiylashtirilib, 15 kun muddatda binoni o‘z holiga qaytarish bo‘yicha topshiriq berilgan.
Izoh (0)