O‘zbekistonning Xitoydagi Bosh konsulligi xodimlari China Southern Airlines aviakompaniyasi bosh direktorining o‘rinbosari Siao Yong bilan muzokara o‘tkazdi. Bu haqda “Dunyo” agentligi xabar berdi.
Qayd etilishicha, muloqot chog‘ida Xitoy kompaniyasi vakiliga O‘zbekistonning sayyohlik salohiyati va ikki davlat o‘rtasida mavjud savdo aloqalari haqidagi batafsil maʼlumotlar taqdim etilgani barobaridagi sayyohlik yo‘nalishida hamkorlik, yangi aviaqatnovlarni yo‘lga qo‘yish masalalari atroflicha muhokama qilingan.
Ikki tomonlama savdo-iqtisodiy aloqalarni yanada rivojlantirish, turizm yo‘nalishida hamkorlikni chuqurlashtirish va Janubiy Xitoydan sayyohlar oqimini ko‘paytirishga xizmat qiladigan Guanchjou—Toshkent—Guanchjou va Guanchjou—Samarqand—Guanchjou yo‘nalishlarida havo qatnovlarini amalga oshirish taklifi bildirilgan.
China Southern Airlines kompaniyasi bosh direktorining o‘rinbosari Siao Yong kompaniya hozirgi kunda Urumchi—Toshkent—Urumchi yo‘nalishida parvozlarni yo‘lga qo‘yganini hamda 2023-yil yoz faslidan boshlab Pekin—Toshkent—Pekin aviaqatnovlarini amalga oshirish rejasi borligini maʼlum qilgan.
“Kompaniyamiz Janubiy Xitoydan O‘zbekistonga turistlar hajmi oshishi bilan Guanchjou—Toshkent—Guanchjou yo‘nalishida ham aviqatnovlarni yo‘lga qo‘yishni ko‘rib chiqishga tayyor”, — deydi Siao Yong.
Muzokaralar yakunida China Southern Airlines kompaniyasi va Bosh konsulxona o‘rtasida doimiy muloqotni davom ettirish hamda Xitoy hududlari bo‘ylab O‘zbekistonning sayyohlik salohiyatiga bag‘ishlangan taqdimotlarni birgalikda o‘tkazishga ahdlashilgan.
Uzbekistan Airways aviakompaniyasi Toshkent–Pekin–Toshkent yo‘nalishi bo‘yicha parvozlarni 10-yanvardan tiklagan edi. Shuningdek, O‘zbekiston va Bruney o‘rtasida to‘g‘ridan to‘g‘ri aviaqatnovlar tashkil etilishi, O‘zbekistondan Misrga amalga oshiriladigan aviaqatnovlar soni ko‘paytirilishi, Polshadan O‘zbekistonga muntazam aviaqatnovlar yo‘lga qo‘yilishi to‘g‘risida xabar berilgandi.
Izoh (0)