Тошкент шаҳар Яшнобод туманидаги кўп қаватли уйлардан бирининг ертўласи ўзбошимчалик билан ўзгартирилгани маълум бўлди. Бу ҳақда Қурилиш ва уй-жой коммунал хўжалиги вазирлиги хабар берди.
Қайд этилишича, қурилиш ва уй-жой коммунал хўжалиги вазири ўринбосари Озода Жўраева Яшнобод тумани Тузел-2 мавзеси “Ватандош” МФЙ 12-б уйда истиқомат қилувчи аҳоли мурожаатларига асосан ўрганиш ишларини олиб борган.
Мурожаатда 9 қаватдан иборат мазкур уйнинг ертўла қисмида тадбиркорлар томонидан ноқонуний ишлар амалга ошириб келинаётгани айтилган. Ҳолат жойида ўрганилганда, ҳақиқатан ҳам кўп қаватли уйнинг ертўласи бузилиб ётгани, ҳатто бино фундаменти ўзгартирилаётгани аниқланган. Мазкур ноқонуний қурилмалар бўйича Қурилиш ва уй-жой коммунал соҳасида назорат инспекциясининг уй-жой фонди ва ичимлик сувидан фойдаланишни назорат қилиш бўйича масъуллари чақиртирилиб, мавжуд ҳолатни тезкорлик билан ўрганиш вазифаси юклатилган.
Вазир ўринбосари, шунингдек, 12-б уй аҳоли вакилларининг коммунал соҳага оид бошқа муаммоларини ҳам тинглаган. Ўз навбатида фуқаролар уйда иссиқлик тизимининг яхши ишламаслиги айтилган. Озода Жўраева пойтахтда ҳолати яхши бўлмаган уйларнинг ички тизимини тўлиқ алмаштириш бўйича ишлар бошлаб юборилганини маълум қилган.
“Бу йил Тошкент шаҳридаги 1 825 та ички тизими носоз, муаммоли кўп квартирали уйнинг коммуникация тизимлари тўлиқ янгиланиши режалаштирилган. Хусусан, сиз истиқомат қилувчи ҳамда маҳаллангиздаги яна 4 та уй ушбу рўйхатга киритилган. Бу бўйича тез кунларда таъмирлаш ишлари бошланади. Ўзаро ҳамжиҳатликда уйингиздаги барча коммунал муаммоларни бартараф этилишига эришамиз”, — дейди вазир ўринбосари.
Таъкидланишича, уйнинг ертўла қисмидаги қоидабузарликлар инспекция томонидан ўрганилмоқда.
Куни кеча Тошкент шаҳрининг Шайхонтоҳур туманидаги кўпқаватли уй ертўласи ўзбошимчалик билан ўзгартирилгани аниқланганди. Фуқаро лойиҳа ҳужжатларидан четга чиққан ҳолда бинонинг таянч деворлари ҳамда коммуникация тармоқлари жойлашувини ўзгартирган. Инспекция томонидан ҳуқуқбузарга нисбатан тегишли тартибда маъмурий баённома расмийлаштирилиб, 15 кун муддатда бинони ўз ҳолига қайтариш бўйича топшириқ берилган.
Изоҳ (0)