Buxoroda yo‘l-harakati qoidalarini buzib, jarimalarni boshqalar yo‘naltirib yuborish yo‘lini topgan “uddaburon” haydovchi aniqlandi, deb xabar beradi IIV YHXX axborot xizmati.
Maʼlum bo‘lishicha, ushbu haydovchi turli avtomobil raqamlarini qirqib olib, harakatlanish davomida o‘zining Gentraʼdagi davlat raqamlariga joylashtirib kelgan. Natijada qoidabuzarlik uchun belgilangan jarimalar boshqa haydovchilar nomiga borgan.
“Kameralardan yashirinmoqchi bo‘lgan bu kabi masʼuliyatsiz, qoidabuzar haydovchilar sabab ayrim vaqtlarda jarima qog‘ozi boshqa manzilga ham borish holatlari kuzatilmoqda. Surishtiruv olib borilib, holatga to‘liq oydinlik kiritilgandan so‘ng, baribir asl qoidabuzar aniqlanyapti”, — deyiladi xabarda.
Qoidabuzar haydovchiga nisbatan maʼmuriy bayonnoma rasmiylashtirilgan.
Eslatib o‘tamiz, O‘zbekistonda 2022-yil 1-dekabrdan haydovchilar uchun jarima ballarini hisoblash tizimi test rejimida ishga tushirilgan. Bunda qoidabuzarliklar avtomatik tarzda dasturiy ta’minotda qayd etib boriladi. Ushbu tizim yangi bo‘lganligi sababli, test rejimida ishlagan vaqtda tizimdagi hamda sodir etilgan qoidabuzarliklardagi barcha xato va kamchiliklar tizimni texnik qo‘llab-quvvatlash davrida bosqichma-bosqich aniqlanib, bartaraf etilib, takomillashtirilib boriladi.
Izoh (0)