Toshkent shahrida tez yordam haydovchilari qoidabuzarliklar uchun jarima qog‘ozlari kelayotgani sabab videomurojaat bilan chiqqani yuzasidan tergovga qadar tekshiruv boshlangani xabar qilingandi. 11-yanvar kuni ularga oid ma’muriy ish ko‘rib chiqildi, deb xabar bermoqda Toshkent shahar sudlari.
Qayd etilishicha, 11-yanvar kuni jinoyat ishlari bo‘yicha Uchtepa tuman sudida Ma’muriy javobgarlik to‘g‘risidagi kodeksning 183-moddasi (mayda bezorilik) va 202-2-moddasi (yolg‘on axborot tarqatish) 2-qismi bo‘yicha M.S. (1974-yilda Toshkent shahrida tug‘ilgan, Toshkent shahar Sog‘liqni saqlash bosh boshqarmasi maxsuslashtirilgan avtoxo‘jaligi haydovchisi) va D.K. (1972-yilda Toshkent shahrida tug‘ilgan, Toshkent shahar Sog‘liqni saqlash bosh boshqarmasi maxsuslashtirilgan avtoxo‘jaligi mexanigi)ga nisbatan yuritilgan ma’muriy ish ko‘rib chiqilgan.
Sud majlisida aniqlanishicha, huquqbuzar M.S. 2023-yil 9-yanvar kuni Telegram messenjeri orqali Sog‘liqni saqlash bosh boshqarmasining maxsuslashtirilgan avtoxo‘jaligiga Toshkent shahar IIBB YHXBdan yuborilgan tez tibbiy yordam avtomashinalari tomonidan sodir etilgan huquqbuzarliklar uchun tayinlangan qarorlarda belgilangan jarimalarni go‘yoki tez tibbiy yordam haydovchilarining oyligidan ushlab qolinayotgani haqida yolg‘on ma’lumotlarni ijtimoiy tarmoqlarga joylagan. M.S. shu sababli tez tibbiy yordam xizmati avtomashinalari chaqiruvga o‘z vaqtida yetib borilmasligida ularni ayblamaslikni ro‘kach qilib, ushbu harakatlari bilan jamoat tartibiga tahdid soluvchi hamda keng jamoatchilikning muhokamasiga va e’tiroziga sababchi bo‘lgan yolg‘on axborot tarqatgan.
Jinoyat ishlari bo‘yicha Uchtepa tumani sudining 2023-yil 11-yanvardagi qarori bilan M.S.ning harakatlarida Ma’muriy javobgarlik to‘g‘risidagi kodeksning 183-moddasida nazarda tutilgan huquqbuzarlik alomatlari yo‘qligi sababli ishning shu qismi kodeksning 271-moddasi (ma’muriy huquqbuzarlik to‘g‘risidagi ishlarni yuritishni istisno etuvchi holatlar) 1-bandiga asosan harakatdan tugatilgan.
M.S. Ma’muriy javobgarlik to‘g‘risidagi kodeksning 202-2-moddasi 2-qismida nazarda tutilgan huquqbuzarlikni sodir etganlikda aybli deb topilib, u 21-modda (huquqbuzarlikning kam ahamiyatliligi sababli ma’muriy javobgarlikdan ozod qilish)ga asosan ma’muriy javobgarlikdan ozod etilgan va ogohlantirilgan.
D.K.ning harakatlarida Ma’muriy javobgarlik to‘g‘risidagi kodeksning 183-moddasi va 202-2-moddasi 2-qismida nazarda tutilgan huquqbuzarliklar alomatlari yo‘qligi sababli unga nisbatan yuritilgan ma’muriy ish harakatdan tugatilgan.
Izoh (0)