Rossiya MDHning Markaziy Osiyo davlatlarini G‘arb bilan o‘zaro munosabatlarni o‘rnatishda maksimal darajada ehtiyot bo‘lishga chaqiradi. Bu haqda tashqi ishlar vaziri o‘rinbosari Mixail Galuzin “TASS”ga bergan intervyusida ma’lum qildi.
Galuzinning so‘zlariga ko‘ra, Rossiya va uning markaziy osiyolik “do‘stlari” Amerikaning “yaxshi xizmatlari” qanday oqibatlarga olib kelishini eslaydi.
“Masalan, AQSHning Afg‘oniston bo‘yicha epopeyasi qanday yakunlandi? Betartiblik va vayronalardan boshqa narsa emas. ‘Eng yaxshi’ holatda, ular rangli inqiloblar bilan tugaydi. Bunday vaziyatda biz markaziy osiyolik hamkorlarimizni G‘arb davlatlari bilan o‘zaro hamkorlikni yo‘lga qo‘yishda imkon qadar ehtiyotkor bo‘lishga chaqiramiz”, — dedi diplomat.
Shuningdek, siyosatchi Markaziy Osiyo va umuman MDH mamlakatlari barqarorligi va xavfsizligini ta’minlash, mintaqadan tashqaridagi o‘yinchilarning emas, balki mintaqa davlatlarining vazifasi ekanini ta’kidladi.
“Bizda buni muvaffaqiyatli hal qilish uchun barcha vositalar: MDH, KXSHT va tegishli ikki tomonlama kelishuvlar mavjud. Shu nuqtayi nazardan, 2022-yilning yanvar oyida Qozog‘istonda sodir bo‘lgan voqealarni eslamaslikning iloji yo‘q. O‘shanda KXSHT tinchlikparvar kuchlarining tezkor va professional harakati Rossiyaning hal qiluvchi roli bilan Qozog‘istonning qonuniy hukumatiga konstitusiyaviy tuzumni imkon qadar tezroq tiklash imkonini berdi. Bu KXSHT samaradorligining eng yaxshi isboti bo‘ldi”, — xulosa qildi Galuzin.
Avvalroq Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel Rossiyaning beqarorlashtiruvchi harakati Markaziy Osiyo mamlakatlariga global tahdid ekanini aytgandi. U Yevropa va Markaziy Osiyo hamkorlikni oshirishi kerakligini qayd etgan. Shuningdek, Borrel Rossiya istilosi Yevropa va Markaziy Osiyo uchun haddan tashqari qaramlikdan qochish zarurligini ta’kidlaganini aytgan.
Izoh (1)
rassiyadan garb anchayazahi