Россия ТИВ Марказий Осиё давлатларини Ғарбга нисбатан эҳтиёткор бўлишга чақирди

Россия МДҲнинг Марказий Осиё давлатларини Ғарб билан ўзаро муносабатларни ўрнатишда максимал даражада эҳтиёт бўлишга чақиради. Бу ҳақда ташқи ишлар вазири ўринбосари Михаил Галузин “ТАСС”га берган интервьюсида маълум қилди. 

Галузиннинг сўзларига кўра, Россия ва унинг марказий осиёлик “дўстлари” Американинг “яхши хизматлари” қандай оқибатларга олиб келишини эслайди.

“Масалан, АҚШнинг Афғонистон бўйича эпопеяси қандай якунланди? Бетартиблик ва вайроналардан бошқа нарса эмас. ‘Энг яхши’ ҳолатда, улар рангли инқилоблар билан тугайди. Бундай вазиятда биз марказий осиёлик ҳамкорларимизни Ғарб давлатлари билан ўзаро ҳамкорликни йўлга қўйишда имкон қадар эҳтиёткор бўлишга чақирамиз”, — деди дипломат.

Шунингдек, сиёсатчи Марказий Осиё ва умуман МДҲ мамлакатлари барқарорлиги ва хавфсизлигини таъминлаш, минтақадан ташқаридаги ўйинчиларнинг эмас, балки минтақа давлатларининг вазифаси эканини таъкидлади.

“Бизда буни муваффақиятли ҳал қилиш учун барча воситалар: МДҲ, КXSҲТ ва тегишли икки томонлама келишувлар мавжуд. Шу нуқтаи назардан, 2022 йилнинг январь ойида Қозоғистонда содир бўлган воқеаларни эсламасликнинг иложи йўқ. Ўшанда КXSҲТ тинчликпарвар кучларининг тезкор ва профессионал ҳаракати Россиянинг ҳал қилувчи роли билан Қозоғистоннинг қонуний ҳукуматига конститусиявий тузумни имкон қадар тезроқ тиклаш имконини берди. Бу КXSҲТ самарадорлигининг энг яхши исботи бўлди”, — хулоса қилди Галузин.

Аввалроқ Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел Россиянинг беқарорлаштирувчи ҳаракати Марказий Осиё мамлакатларига глобал таҳдид эканини айтганди. У Европа ва Марказий Осиё ҳамкорликни ошириши кераклигини қайд этган. Шунингдек, Боррел Россия истилоси Европа ва Марказий Осиё учун ҳаддан ташқари қарамликдан қочиш зарурлигини таъкидлаганини айтган.