Turkiyaning zilzila ro‘y bergan Hatay viloyatidagi bir nechta mahalla 2013-yilda xavfli hudud deb topilgan

Turkiyaning zilzila sodir bo‘lgan Hatay viloyatidagi bir nechta mahallalar 2013-yildayoq eng xavfli hududlar sifatida eʼtirof etilgan. Bu haqda “Daryo”ga Turkiya respublikasi prezidenti huzuridagi Kommunikatsiyalar boshqarmasining Toshkent elchixonasi Kommunikatsiyalar bo‘yicha maslahatchisi Hamdi Turshuju xabar berdi.

Maʼlum qilinishicha, xorij OAVda Turkiyadagi zilzila haqida xabarlar tarqalib, “Zilzila hududi xavfli emasmish”, degan maʼlumotlar keltirilgan.

“Baʼzi ommaviy axborot vositalaridagi ‘Zilzila hududi xavfli emasmish’ sarlavhasi bilan eʼlon qilingan xabarlar haqiqatni aks ettirmaydi. 65 foizi litsenziyasiz binolardan iborat bo‘lgan Hatayning Iskenderun tumanidagi Meydan, Esentepe, Jumhuriyat, Numune, Pınarboshi va Modernevler mahallalari Vazirlar Kengashi qarori bilan 2013-yilda xavfli hudud deb eʼlon qilingan edi”, — deyiladi rasmiy maʼlumotida.

Taʼkidlanishicha, zilzilaga tayyorgarlik ko‘rish maqsadida olib borilayotgan shaharni o‘zgartirish ishlariga ayrim joylardan eʼtirozlar kelib, Vazirlar Kengashining ushbu qarori sudga yetkazilgan. Eʼtirozga ko‘ra, Vazirlar Kengashining “xavfli hudud” qarori Oliy Sud (Daniştay) tomonidan bekor qilingan. Shundan so‘ng, hududdagi litsenziyasiz binolar odamlarning hayoti va mol-mulkini yo‘qotishiga olib kelmasligi uchun Vazirlar Kengashi qarori bilan ushbu hududlar qayta xavfli hududlar deb eʼlon qilingan. Biroq xuddi shu segmentlar bu qarorni sudga berishdi va yana bekor qilinganidan keyin shaharni o‘zgartirish jarayonini to‘sib qo‘ygan.

“Jarayonga yo‘l ochish uchun, ilmiy va texnik hisobotlarni hisobga olgan holda, hududga asoslangan shahar o‘zgarishi o‘rniga uchastkaga asoslangan transformatsiya jarayonini boshlashga qaror qilindi. Davom etayotgan jarayonda atrof-muhit, shaharsozlik va iqlim o‘zgarishi vazirligi, Hatayda TOKİ tomonidan amalga oshirilgan shaharni o‘zgartirish ishlari doirasida yuqorida qayd etilgan hududdagi fuqarolarimizning 80 foizi bilan kelishuvga erishdi. 460 ta uy uchun tender boshlandi va jarayon davom etmoqda”, — deydi Turkiya Respublikasi prezidenti huzuridagi Kommunikatsiyalar boshqarmasining Toshkent elchixonasi Kommunikatsiyalar bo‘yicha maslahatchisi Hamdi Turshuju.