Bugungi kunda “O‘zbekneftgaz” aksiyadorlik jamiyati O‘zbekistonda neft va gazni qazib chiqarish va qayta ishlash bilan shug‘ulanadigan asosiy kompaniya hisoblanadi.
“O‘zbekneftgaz” AJ tasarrufida 118 ta kon mavjud bo‘lib, shundan 85 tasidan tabiiy gaz qazib olinmoqda. Qolgan 33 ta konda geologiya-qidiruv ishlari amalga oshirilmoqda.
2022-yilda tizimni talab darajasida ishlashi uchun uglevodorod konlarini samarali va maqsadli ishlatish, ulardan tabiiy gaz va suyuq uglevodorod xom ashyosi qazib chiqarishni oshirish hamda mavjud quduqlarning bir maromda ishlatilishini taʼminlash hamda yangi konlar ochish, ishlab chiqarish quvvatlarini modernizatsiya qilish bo‘yicha samarali natijalarga erishildi.
“O‘zbekneftgaz” AJning O‘zbekistonda uglevodorodlarni qazib chiqarishdagi ulushi tabiiy gaz qazib chiqarish bo‘yicha 63,0 foiz, gaz kondensati qazib chiqarish bo‘yicha 67,0 foiz, neft qazib chiqarish bo‘yicha 13,0 foizni tashkil etadi.
“O‘zbekneftgaz” AJ tasarrufidagi tabiiy gaz qazib olish konlari, uzoq yillardan beri ishlatilayotganligi sababli, qatlam bosimlari tushish kuzatilmoqda. Qayd etish joizki, “O‘zbekneftgaz” AJda 96 foiz tabiiy gaz qazib chiqarish kompressor stansiyalari orqali amalga oshirilmoqda. Gaz qazib olish barqarorligini taʼminlash hamda gaz zaxiralarini maksimal o‘zlashtirish maqsadida, har yili qo‘shimcha siquv kompressor stansiyalarini qurish orqali qazib olish hajmi taʼminlanmoqda.
O‘tgan yili uglevodorodlarni qazib chiqarish ko‘rsatkichlariga erishish uchun, 84 ta quduqda burg‘ilash ishlari, 711 ta quduqda kapital taʼmirlash va 27 ta texnologik chora-tadbirlar bajarildi.
Natijada o‘tgan yilda 32,2 mlrd kub metr tabiiy gaz, 1 428,6 ming tonna gaz kondensati, 100,2 ming tonna neft qazib chiqarishga erishildi.
2022-yilda “O‘zbekneftgaz” AJ konlarning tabiiy gaz zahirasi 35,1 mlrd kub metrga, gaz kondensati zaxirasi 1 206,0 ming tonnaga o‘stirildi.
“O‘zbekneftgaz” AJning O‘zbekistonda neft mahsulotlarini ishlab chiqarishdagi ulushi avtobenzin bo‘yicha 72,0 foiz, dizel yonilg‘isi bo‘yicha 46,0 foiz, aviakerosin bo‘yicha 83,0 foizni tashkil etadi.
O‘tgan yilda 1,7 mln tonna uglevodorod xomashyosi qayta ishlanib, 999,8 ming tonna avtobenzin, shundan GTL hafta hisobiga 24,6 ming tonna, 470,6 ming tonna dizel yonilg‘isi, shundan GTL dizel yonilg‘isi – 139,5 ming tonna, 140,8 ming tonna aviakerosin, shundan GTL aviakerosini hisobiga – 13 ming tonna ishlab chiqarildi.
Qish mavsumida isteʼmolchilarni avtobenzin bilan uzluksiz taʼminlash va uning narxini keskin oshishini oldini olish maqsadida hukumatning tegishli qaroriga muvofiq, 2022-yil 10-dekabrdan 2023-yil 1-martga qadar import qilinadigan, mahalliy korxonalar tomonidan ishlab chiqariladigan va isteʼmolchilarga sotiladigan AI-80 avtobenzini uchun aksiz solig‘i “nol” stavkada qo‘llash belgilandi. Natijada “O‘zbekneftgaz” AJ tasarrufdagi AYOQSHlarda AI-80 avtobenzin narxi 6 800 so‘mdan 5 700 so‘mgacha arzonlashtirilib, 2022-yil 13-dekabrdan arzon narxda aholiga yetkazib berildi.
Maʼlumot uchun: Respublika bo‘yicha jami 2 127 ta yoqilg‘i quyish shohobchalari faoliyat ko‘rsatmoqda, shundan 239 tasi “O‘zbekneftgaz” AJ ga tegishlidir (“UNG Petro”ga qarashli – 69 ta; neft bazalarga qarashli – 170 ta).
“O‘zbekneftgaz” AJning O‘zbekistonda suyultirilgan gaz ishlab chiqarishdagi ulushi 80,0 foizni tashkil etdi.
2022-yilda 697,8 ming tonna suyultirilgan gaz ishlab chiqarishga erishildi. Isteʼmolchilarga jami 683,2 ming tonna suyultirilgan gaz yetkazib berildi. Ushbu ko‘rsatkich 2021-yilga nisbatan 26,1 ming tonnaga ko‘pdir. 615,2 ming tonnasi aholining maishiy ehtiyojlari va ijtimoiy sohalar uchun “Hududgaztaʼminot” ga imtiyozli narxda (1 tonnasi uchun 495 ming so‘mdan) yuklandi.
2022-yilda jami 655,2 mln dollar qiymatida investitsiyalar o‘zlashtirildi.
Tizimni talab darajasida ishlashi, yangi konlar qidirish va quduqlar ekspluatatsiyasi uchun hamda kompaniyaning ishlab chiqarish quvvatlarining modernizatsiyalash jarayonlari uchun 2022-yilda jami 655,2 mln dollar qiymatida investitsiyalar o‘zlashtirildi. Shundan 355,2 mln dollari to‘g‘ridan to‘g‘ri xorijiy investitsiyalar va kreditlar hisobiga to‘g‘ri keladi.
Xususan, umumiy qiymati 128,5 mln dollarga teng bo‘lgan quyidagi 2 ta obyekt qurilib, ishga tushirildi:
- Sho‘rtan neft va gaz qazib chiqarish boshqarmasiga qarashli “Sho‘rtan” Bosh inshootidan Sho‘rtan gazkimyo majmuasi va Uzbekistan GTL zavodigacha 33 km uzunlikdagi gaz quvuri ishga tushirildi. Ushbu loyihaning umumiy qiymati 40,7 mln dollarni tashkil etdi. Loyiha doirasida 12 nafar mutaxassis ish bilan taʼminlandi. Loyihani amalga oshirish natijasida kunlik 14,0 mln kub metr tozalangan tabiiy gazni transport qilish imkoniyati yaratildi.
- “Dengizko‘l” konida siquv kompressor stansiyasi ishga tushirildi. Ushbu loyihaning umumiy qiymati – 87,8 mln dollarni tashkil etadi. Loyiha doirasida 15 nafar mutaxassis ish bilan taʼminlandi. Loyihani amalga oshirish natijasida yillik qo‘shimcha 290 mln kub metr tabiiy gaz qazib chiqarishga erishildi.
Shuningdek, taʼkidlash lozim “O‘zbekneftgaz” AJ va uning filiallari yirik ish beruvchi tarmoq hisoblanadi. Bugun tizim korxonalarida qariyb 36 mingga yaqin ishchi-xizmatchilar mehnat qilishmoqda. Ularning 3881 nafarini xotin-qizlar, 6040 nafarini yoshlar tashkil etadi.
“O‘zbekneftgaz” AJ tomonidan 2022-yilda davlat byudjetiga 7,8 trln so‘m miqdorida, 2021-yilga nisbatan 1,8 trln so‘mga yoki 130 foizga ko‘p soliq va dividendlar to‘landi. Tushumlarning o‘sishi Uzbekistan GTL zavodi hisobiga to‘g‘ri keldi.
“O‘zbekneftgaz” AJ Matbuot xizmati
Izoh (0)