“Tashkent Pharma Park” farmatsevtika klasteri hududida Misr bilan hamkorlikda dori ishlab chiqariladi. Bu haqda Investitsiyalar, sanoat va savdo vazirligi axborot xizmati xabar berdi.
Xabarga ko‘ra, O‘zbekiston hukumat delegatsiyasining Misrga tashrifining ikkinchi kuni investitsiyalar, sanoat va savdo vaziri Laziz Kudratov Misrning yetakchi kompaniyalari rahbarlari bilan qator uchrashuvlar o‘tkazdi, ularda qo‘shma loyihalarni amalga oshirish va ikki tomonlama hamkorlikni rivojlantirish masalalari ko‘rib chiqildi.
Xususan, ElAraby Group bosh direktori Muhamed Mahmud al-Arabiy bilan maishiy texnika ishlab chiqarishni tashkil etish istiqbollari muhokama qilindi (kompaniya Sony, Toshiba, Sharp, Hitachi va NEC Yaponiya brendlari ostida 1000 dan ortiq turdagi maishiy texnika ishlab chiqaradigan 26 zavodga ega. Eksport geografiyasi dunyoning 60 ta davlatini qamrab oladi. Aktivlar - 6 mlrd dollar). Muzokaralar natijasida maishiy texnika ishlab chiqarish loyihasini ishlab chiqishni boshlash bo‘yicha kelishuvga erishildi.
Shuningdek, Orascom Investment Holding prezidenti Amjad Sabri bilan uchrashuvda geologiya, turizm va qishloq xo‘jaligi sohalarida qo‘shma loyihalarni amalga oshirish masalalari ko‘rib chiqildi (Misrning eng yirik investitsiya kompaniyasi. Infratuzilmaviy loyihalarni qurish va shakar ishlab chiqarishga ixtisoslashgan. Kompaniya 12 mamlakatda 35 ta mehmonxonaga egalik qiladi. Aktivlari - 10 milliard dollar). Tog‘-kon va oziq-ovqat sanoatlari loyihalarini ishlab chiqish, shuningdek, mehmonxona majmualarini qurish bo‘yicha qo‘shma ishchi guruh tuzish masalasi kelishib olindi.
Bundan tashqari, Orascom Construction kompaniyasi bilan muzokaralar tashrifning ikkinchi kunida davom etdi (kompaniya an’anaviy va qayta tiklanadigan elektr energiyasi, qurilish materiallari ishlab chiqarish, suv resurslarini qayta ishlash va boshqarish sohalarida 70 yillik tajribaga ega). Bu safar ushbu kompaniya prezidenti Omar Bebars bilan avval erishilgan kelishuvlardan tashqari yangi loyihaviy tashabbuslar muhokama qilindi. Shu tariqa, Misr tomoni O‘zbekistonda keyinchalik uning hududida lak-bo‘yoq hamda qurilish materiallari uchun kimyoviy moddalar ishlab chiqarish quvvatlarini ishga tushirgan holda sanoat parkini tashkil etish, shuningdek, yangi investitsiyaviy loyihalarni amalga oshirish uchun sanoat korxonalari – kompaniya hamkorlarini jalb qilishga qiziqishini bildirdi.
Poliserve kompaniyasi (kimyoviy o‘g‘itlar ishlab chiqaruvchisi va Afrika mamlakatlariga eng yirik yetkazib beruvchi hisoblanadi) raisi Sharif Mustafo al-Gabaliy bilan uchrashuvda kimyo sanoati sohasida hamkorlikni rivojlantirish masalalari ko‘rib chiqildi. Tomonlar kompaniyaning O‘zbekistonda yirik loyihalarni amalga oshirishdagi ishtiroki tahlil qildi.
Shu bilan birgalikda, ACDIMA kompaniyasi (Misrdagi eng yirik farmatsevtika ishlab chiqaruvchisi. 1000 dan ortiq turdagi farmatsevtika mahsulotlari ishlab chiqaradi. Eksport geografiyasi dunyoning 60 mamlakatini o‘z ichiga oladi) raisi Olfat G‘orab bilan farmatsevtika sanoatida sanoat kooperatsiyasini rivojlantirish imkoniyatlari muhokama qilindi. “Tashkent Pharma Park” farmatsevtika klasteri hududida dori vositalari ishlab chiqarishni tashkil etish bo‘yicha kelishuvga erishildi.
Cottonil kompaniyasi (kompaniya Misrning eng yirik tekstili, ichki kiyim va paypoq ishlab chiqaruvchisi. Zara, Calvin Klein, Hugo Boss va boshqa xalqaro brendlar uchun mahsulotlar ishlab chiqaradi) bosh direktori Meram Gabr bilan to‘qimachilik sanoatida qo‘shma loyihalarni amalga oshirish masalalari atroflicha muhokama qilindi. O‘zbekistonning investitsiyaviy salohiyati taqdim etilishi va sanoat kooperatsiyasi imkoniyatlarini muhokama qilinishi yakunlari bo‘yicha Qashqadaryo viloyatida tayyor to‘qimachilik mahsulotlari ishlab chiqarish bo‘yicha qo‘shma loyihani tashkil etish masalasi kelishib olindi.
Izoh (0)