Zangiotada “Volga” suvga tushib ketishi oqibatida haydovchi halok bo‘ldi (video)

Toshkent viloyati Zangiota tumanida 11-fevral kuni “Volga” kanalga tushib ketdi. Bu haqda “Avtopatrul” ko‘rsatuvida xabar berildi.

Ma’lum bo‘lishicha, 2000-yilda tug‘ilgan fuqaro haydovchilik guvohnomasiga ega bo‘lmasdan turib “Volga” avtomobilini boshqargan. U magistral yo‘lda mashina boshqaruvini yo‘qotib, yo‘l chetiga chiqib ketgan.

Buning oqibatida GAZ-31029 (“Volga”) Bo‘zsuv kanaliga tushib ketgan. Haydovchi esa mashinadan chiqolmay, ko‘p suv yutishi oqibatida halok bo‘lgan. Qutqaruvchilar voqea joyiga yetib borib, avtomobilni kanaldan chiqarib olgan.

“Hurmatli yo‘l harakati ishtirokchilari! Ko‘rib turganingizdek, yo‘l-transport hodisalariga tezlikni oshirish, belgilanmagan joydan harakatlanish, qoidalarga amal qilmaslik sabab bo‘ldi va, eng achinarlisi, oilalar boquvchisidan, farzandidan ayrildi. Hayot atalmish buyuk ne’matni yo‘llarda qurbon qilmang”, — deyiladi xabarda.