Toshkent viloyati Oqqo‘rg‘on tumanida yashovchi oilada 17-fevral kuni ovqatdan ommaviy ravishda zaharlanish holati sodir bo‘ldi. Bu haqda “Daryo”ga Bosh prokuratura matbuot kotibi Hayot Shamsutdinov xabar berdi.
Ma’lum qilinishicha, voqea joyida oilaning 3 nafar a’zosi: 1961-yilda tug‘ilgan ayol A.Z., 1978-yilda tug‘ilgan erkak X.M. va 1982-yilda tug‘ilgan ayol S.R. vafot etgan. Shuningdek, ushbu xonadonda yashovchi 18 yoshli R.M., 20 yoshli D.M., 11 yoshli T.M. va 2 yoshli H.A. “noma’lum etiologik zaharlanish” tashxisi bilan tibbiyot birlashmasiga yotqizilgan. Ko‘rsatilgan tibbiy yordamlarga qaramasdan, 18 yoshli R.M. kasalxona jonlantirish bo‘limida vafot etgan.
Holat yuzasidan tayinlangan sud-tibbiyot ekspertizasining dastlabki ma’lumotnomasida fuqarolar marhumlarning o‘limi bo‘yicha sud tibbiy tashxisi “is gazidan o‘tkir zaharlanish, murda dog‘larining och pushti rangdaligi, ichki a’zolar pushti rangga kirishi, qonning suyuq holati, ichki a’zolarning to‘laqonligi, miya va o‘pka shishi, noma’lum etiologiyali ovqatdan zaharlanish” ekanligi qayd etilgan. Hozirda tuman prokuraturasi tomonidan tergovga qadar tekshiruv o‘tkazilmoqda, natijasi haqida qo‘shimcha axborot berilishi ta’minlanadi.
Izoh (0)