Shavkat Mirziyoyev 17-fevral kuni Buxoro shahridagi Mir Arab madrasasiga tashrifi paytida endilikda kam ta’minlanganlarga Umraga borishda yordam berilishini ma’lum qildi.
Prezident madrasa talabalari bilan uchrashuv davomida so‘nggi yillarda Umra va Haj safarlariga qatnov soni ko‘paytirilganini ta’kidladi. “Umraga xohlagancha ruxsat berilyapti. Haj safarlari karra-karra ko‘paydi. E’tiqod insonning yuragida, bag‘rida, ko‘nglida bo‘ladi”, — deydi prezident.
Shundan keyin davlat rahbari muftiy va talabalarga yuzlanib, kimda qanday taklif bo‘lsa, eshitishga tayyor ekanini aytdi. Nuriddin Xoliqnazarov Umraga borishga imkoniyati yetmaydigan kam ta’minlanganlar uchun davlat tomonidan yordam berilishini so‘radi.
“Sizdan bitta iltimos bo‘ladi, adolatli tanlov qilib bersangiz, xohlaganingizcha yordam beraman. Haqiqiy kam ta’minlanganlar istagi, albatta, ijobat bo‘ladi. Ularning ro‘yxatini shakllantirib bering. Kerak bo‘lsa, u yerdagi rahbarlarga ham aytib, ularni alohida-alohida kutib oladigan qilib tashkillashtiramiz”, — deya javob qaytardi prezident.
Izoh (0)