Yangi Zelandiyaning Oklend shahridan havoga ko‘tarilgan Air New Zealand samolyoti AQSHning Jon F.Kennedi aeroporti terminalida yong‘in chiqqani sababli 16 soatlik parvozdan so‘ng ortga qaytishga majbur bo‘ldi. Bu haqda parvozlarni kuzatuvchi Flightradar servisi ma’lumotlarida aytiladi.
The Washington Post gazetasining aviakompaniya bayonotiga tayanib yozishicha, Oklend—Nyu-York reysi yong‘in va terminalning yopilishi sababli “Oklendga qaytishga majbur bo‘lgan”. Gazeta bu parvozni “hech qayerga uchish” deb atagan.
Korean Air ham xuddi shunday qaror qabul qildi: Seuldan uchgan samolyot 5 soatdan ko‘proq vaqtdan keyin ortga qaytdi. “Aviakompaniya 14 soatlik parvoz davomida taxminan 5 soat 30 daqiqadan so‘ng burilishdan boshqa chora yo‘qligini tan oldi. Barcha variantlar ko‘rib chiqildi, bosib o‘tilgan masofa va operativ sharoit singari ko‘plab omillarni hisobga olgan holda Inchxonga qaytish to‘g‘risida qaror qabul qilindi”, — deyiladi aviakompaniya bayonotida.
Nyu-Yorkdagi Jon F.Kennedi aeroporti 16-fevral kuni kechqurun elektr panelidagi nosozlik oqibatida elektr ta’minoti uzilishi hamda “kichik izolyatsiyalangan yong‘in” haqida xabar berdi. 17-fevral kuni ertalab aeroport 1-terminal rekonstruksiya ishlari uchun yopilganini ma’lum qildi.
Terminal parvozlar uchun haligacha yopiq, u yerdan birorta samolyot uchmayapti, ammo 18-fevraldan boshlab “cheklangan amaliyotlar” boshlanishi kutilmoqda.
Izoh (0)