Янги Зеландиянинг Окленд шаҳридан ҳавога кўтарилган Air New Zealand самолёти АҚШнинг Жон Ф.Кеннеди аэропорти терминалида ёнғин чиққани сабабли 16 соатлик парвоздан сўнг ортга қайтишга мажбур бўлди. Бу ҳақда парвозларни кузатувчи Flightradar сервиси маълумотларида айтилади.
The Washington Post газетасининг авиакомпания баёнотига таяниб ёзишича, Окленд—Нью-Йорк рейси ёнғин ва терминалнинг ёпилиши сабабли “Оклендга қайтишга мажбур бўлган”. Газета бу парвозни “ҳеч қаерга учиш” деб атаган.
Korean Air ҳам худди шундай қарор қабул қилди: Сеулдан учган самолёт 5 соатдан кўпроқ вақтдан кейин ортга қайтди. “Авиакомпания 14 соатлик парвоз давомида тахминан 5 соат 30 дақиқадан сўнг бурилишдан бошқа чора йўқлигини тан олди. Барча вариантлар кўриб чиқилди, босиб ўтилган масофа ва оператив шароит сингари кўплаб омилларни ҳисобга олган ҳолда Инчхонга қайтиш тўғрисида қарор қабул қилинди”, — дейилади авиакомпания баёнотида.
Нью-Йоркдаги Жон Ф.Кеннеди аэропорти 16 февраль куни кечқурун электр панелидаги носозлик оқибатида электр таъминоти узилиши ҳамда “кичик изоляцияланган ёнғин” ҳақида хабар берди. 17 февраль куни эрталаб аэропорт 1-терминал реконструкция ишлари учун ёпилганини маълум қилди.
Терминал парвозлар учун ҳалигача ёпиқ, у ердан бирорта самолёт учмаяпти, аммо 18 февралдан бошлаб “чекланган амалиётлар” бошланиши кутилмоқда.
Изоҳ (0)