Shimoliy Koreya yetakchisi Kim Chen In qizi Kim Chju E bilan birga marhum yetakchi Kim Chen Irning tug‘ilgan kuni munosabati bilan Vazirlar Mahkamasi va Mudofaa vazirligi jamoalari o‘rtasida o‘tkazilgan sport musobaqasini tomosha qildi. Bu haqda Koreya markaziy telegraf agentligi xabar berdi.
Tadbirda ikkita musobaqa — futbol o‘yini va arqon tortish o‘tkazildi. Ikkala holatda ham Mudofaa vazirligi jamoasi g‘alaba qozondi: futbolda Vazirlar Mahkamasi vakillari 3:1, arqon tortishda 2:0 hisobida mag‘lub etildi, deb yozadi agentlik.
.jpg)
Musobaqani mudofaa vaziri Kan Sun Nam va Koreya Mehnat partiyasi Markaziy qo‘mitasi polityuri prezidiumi a’zosi Cho Yon Von, hukumat a’zolari va boshqa vazirlik xodimlari ham tomosha qilgan.
2022-yilning noyabr oyiga qadar KXDR rasmiylari mamlakat rahbarining farzandlari borligini tasdiqlamagan edi. Janubiy Koreya razvedkasi ma’lumotlariga ko‘ra, Kim va uning rafiqasi Li Sol Chjuning 2010, 2013 va 2017-yillarda tug‘ilgan ikki qizi va bir o‘g‘li bor.
Fevral oyi boshida Shimoliy Koreya yetakchisining qizi KXDR armiyasi tashkil etilganining 75 yilligiga bag‘ishlangan harbiy paradda ishtirok etgandi, shundan so‘ng Janubiy Koreya OAVlari uning davlat rahbari vorisi bo‘lishi ehtimolini muhokama qila boshladi.
8-fevral kuni ham Kim Chen In qizi bilan ommaga ko‘rinish bergan. O‘shanda qiz ota-onasi bilan Koreya xalq armiyasining 75 yilligi munosabati bilan o‘tkazilgan boshqa tadbirlarda qatnashgan.
Izoh (0)