Anadolu agentligi Turkiyadagi dahshatli zilziladan omon qolgan oilalardan biri vayronalar ostidan qanday tasodif bilan qutqarib olingani haqida yozdi.
Ma’lum qilinishicha, Turkiya sharqidagi Malatya viloyatida yashaydigan bu oila uyali telefon sharofati bilan qutqarilgan. Niyoziy Misri kvartalida zilzila sodir bo‘lgan vaqtda zarba kuchidan uy derazasi oldida turgan telefon tashqariga uchib ketgan. Keyinchalik vayronalar yonida yurgan chet ellikning ko‘zi telefonga tushadi, o‘sha paytda oilaning qarindoshlari qo‘ng‘iroq qilayotgan edi. Xorijlik go‘shakni olib bino qulagani haqida xabar bergan, buning natijasida ular tezda voqea joyiga yetib kelishgan va yaqinlarini chiqarib olishgan.
Oila boshlig‘i Ilhami Ekin, zilziladan so‘ng rafiqasi Songul, qizlari Tuba va Suna, o‘g‘li Muhammad bilan vayronalar ostida qolganini aytdi. Zilzila vaqtida erkakning uyali telefoni deraza tokchasida turgan va turtki kuchi ta’sirida ko‘chaga otilgan.
Ilhami Ekinning so‘zlariga ko‘ra, vayronalar ostida oila umidsizlikka tushgan, biroq baxtli tasodif ularning hayotini saqlab qolgan.
“Uchinchi qavatda yashardik. 18 yoshli o‘g‘lim vafot etdi. U harbiy bo‘lishni orzu qilardi. Xudo hech kimni bunday qayg‘uga solmasin. Vayronalar ostida qolgan barchaga Alloh taolo yordam bersin”, — deydi u.
Malatyalik erkak rafiqasi va qizlari bilan vayronalar ostidan eng birinchilardan bo‘lib qutqarilgan.
“Hammamiz jarohat oldik. Qizim va xotinim kasalxonaga yotqizildi, ikkinchi qizim va men haligacha muolaja olyapmiz. Chap oyog‘imda sinishlar bor. Operatsiya qilishdi, hozir o‘zimni yaxshi his qilyapman”, — deydi u.
Izoh (0)