AQSH prezidenti Jo Bayden mamlakatdagi qurolli zo‘ravonlikni “epidemiya” deb atadi. Bu haqda uning Oq uy saytida chop etilgan bayonotida aytiladi.
“Yil boshidan beri endi 48 kun o‘tdi, mamlakatimizda esa allaqachon kamida 73 ta ommaviy otishma sodir etildi. Hamdardlik va ibodat yetarli emas. Qurolli zo‘ravonlik — epidemiya, Kongress hoziroq harakatni boshlashi kerak”, — dedi davlat rahbari.
Uning ta’kidlashicha, AQSH “sog‘lom fikrga asoslangan” qurol qonunchiligini isloh qilishi zarur. Bular barcha qurol sotuvlarini tekshirish talabi, hujum qurollari va o‘qdoni katta avtomatlarni taqiqlash kabilarni o‘z ichiga olishi kerak. Bundan tashqari, qurol ishlab chiqaruvchilarga nisbatan cheklovlar qo‘llanishi kerak. “Bular odamlar hayotini saqlab qolish uchun Kongress tomonidan hoziroq tashlanishi mumkin bo‘lgan oqilona qadamlar”, — deya xulosa qildi Bayden.
17-fevral kuni Missisipi shtatida qurollangan shaxs kichik shaharchada o‘t ochib, qo‘lga olingunga qadar sobiq rafiqasi va yana besh kishini uch xil joyda otib o‘ldirdi, deb xabar bermoqda Reuters. Otishma 300 kishidan kam odam yashaydigan Arkabutla qishlog‘ida sodir bo‘lgan. 51 yoshli hujumchi Richard Deyl Kram birinchi darajali qotillikda ayblanmoqda, chunki otishma odam o‘ldirish niyatida qasddan sodir etilgan.
Yanvar oyida Kaliforniyada bir hafta ichida to‘rtta, bir oy ichida jami oltitda otishma sodir bo‘ldi. 28-yanvar kungi otishma oqibatida 3 kishi halok bo‘ldi, yana to‘rt kishi yaralandi.
Izoh (0)