S&P Global Ratings butun dunyodagi murakkab geosiyosiy vaziyatga qaramay, O‘zbekistonda iqtisodiy tiklanish davom etadi, deb hisoblayapti. Bu haqda agentlik hisobotida qayd etilgan.
Agentlik ta’kidlashicha, O‘zbekiston 2022 yilda Rossiya va Ukraina o‘rtasidagi urush oqibatlarini kutilganidan yaxshiroq yengib o‘tgan. Bunga asosan Rossiyadan pul o‘tkazmalarining keskin ko‘payishi sabab bo‘lgan.
S&P 2023-yilda yalpi ichki mahsulotning o‘sishi 5 foiz atrofida, 2024—2025-yillarda esa 5,5 foizni tashkil etishini prognoz qilmoqda.
Shuningdek, agentlik tomonidan 2022-yilda kuzatilgan katta hajmdagi pul o‘tkazmalari vaqtincha bo‘lishi, 2023 yilda ko‘rsatkich pasayishi mumkinligini ta’kidlangan.
Bundan tashqari, O‘zbekistonda faoliyat yuritayotgan banklar uchun iqtisodiy risklarning rivojlanish tendensiyasini barqaror deb baholanmoqda.
Agentlik 2023-yilda banklardagi kreditlashning o‘rtacha o‘sishini prognoz qilmoqda. Bu asosan chakana va tijorat kreditlashning o‘sishi bilan bog‘liq. 2024-yilda kreditlash yanada ko‘payishi mumkin. O‘zbekiston bank sektorida dollarlashuv saqlanib qolishi kutilmoqda.
Hisob-kitoblarga ko‘ra, 2022-yilda O‘zbekistonning aholi jon boshiga yalpi ichki mahsuloti taxminan 2 147 dollarni tashkil etgan, bu nisbatan pastroq ko‘rsatkich.
Agentlik fikricha, aholi jon boshiga pastroq bo‘lgan YIM yuzaga kelishi mumkin bo‘lgan stressli vaziyatlarga qarshi turish qobiliyatini cheklaydi.
Biroq tahlilchilar aholining real daromadlari rasmiy statistikadan ma’lum darajada yuqoriroq bo‘lishi mumkinligini ta’kidlagan. Bunga mamlakatda katta hajmda yashirin iqtisodiyot ham mavjud.
S&P Global Ratings — Amerika kredit reytingi agentligi va S&P Global kompaniyasining aksiyalar, obligatsiyalar va tovarlar bo‘yicha moliyaviy tadqiqotlar va tahlillarni nashr etadigan bo‘limi. S&P, Moody’s va Fitch’ni ham o‘z ichiga oladigan Katta uchlik kredit reyting agentliklarining eng kattasi hisoblanadi.
Izoh (0)