O‘tgan yili O‘zbekiston mandarin importini keskin oshirdi — jismoniy jihatdan ushbu mahsulot importi hajmi 63,6 ming tonnaga yetdi, bu 2021-yilga nisbatan 1,8 barobar ko‘pdir, deya xabar bermoqda EastFruit.
“Koronavirus” tufayli 2020-yilgi import hajmi pasayishidan so‘ng O‘zbekiston mandarin importini nafaqat tikladi, balki ketma-ket ikkinchi yil oshirmoqda ham.
2022-yili import hajmining mutlaq qiymati bilan birga o‘sish sur’ati ham barcha rekordlarni yangiladi.
Qayd etilishicha, importning bunday yuqori o‘sish sur’atlari O‘zbekistonning xalqaro savdosini liberallashtirish davom etayotgani bilan qisman bog‘liqdir.
Xususan, 2022-yilning noyabr oyida sitrus mevalar va banan importi uchun nol stavkalar qo‘llanilishi yana bir bor uzaytirildi.
“Import (olma, banan, kivi, sitrus mevalar va boshqa mevalar importi) keskin oshishiga yana bir sabab 2021-yili olma hosili past bo‘lganligi va 2021—2022-yillardagi qish mavsumida uning narxi keskin oshgani bo‘ldi. Uchinchi sabab — mamlakat aholisi soni jadal o‘sib borayotgani va O‘zbekiston iqtisodiyotining o‘sish sur’atlari davom etayotgani hamda 2022-yilda mamlakatga kelgan xorijliklar soni oshganidir. To‘rtinchi sabab, albatta, oziq-ovqat chakana savdosining davom etayotgan jadal rivojlanishi va bu import qilingan mevalar realizatsiyasida eng kuchli sabab hisoblanadi”, — deydi BMTning Oziq-ovqat va qishloq xo‘jaligi tashkiloti investitsion departamenti iqtisodchisi Andriy Yarmak.
Davlat statistika qo‘mitasi ma’lumotlariga ko‘ra, 2022-yilda O‘zbekiston bozoriga mandarinning asosiy yetkazib beruvchilari Pokiston, Xitoy va Turkiya bo‘ldi. Jami importning 96,2 foizi ushbu mamlakatlarning umumiy ulushiga to‘g‘ri keladi:
- Pokiston — 51,1 ming tonna (umumiy importning 80,3 foizi);
- Xitoy — 5,8 ming tonna (9,1 foiz);
- Turkiya — 4,3 ming tonna (6,8 foiz);
- Eron — 778 tonna (1,2 foiz);
- Misr — 442 tonna (0,7 foiz);
- Boshqa mamlakatlar — 1,2 ming tonna (1,9 foiz).
Izoh (0)