S&P Global Ratings бутун дунёдаги мураккаб геосиёсий вазиятга қарамай, Ўзбекистонда иқтисодий тикланиш давом этади, деб ҳисоблаяпти. Бу ҳақда агентлик ҳисоботида қайд этилган.
Агентлик таъкидлашича, Ўзбекистон 2022 йилда Россия ва Украина ўртасидаги уруш оқибатларини кутилганидан яхшироқ енгиб ўтган. Бунга асосан Россиядан пул ўтказмаларининг кескин кўпайиши сабаб бўлган.
S&P 2023 йилда ялпи ички маҳсулотнинг ўсиши 5 фоиз атрофида, 2024—2025 йилларда эса 5,5 фоизни ташкил этишини прогноз қилмоқда.
Шунингдек, агентлик томонидан 2022 йилда кузатилган катта ҳажмдаги пул ўтказмалари вақтинча бўлиши, 2023 йилда кўрсаткич пасайиши мумкинлигини таъкидланган.
Бундан ташқари, Ўзбекистонда фаолият юритаётган банклар учун иқтисодий рискларнинг ривожланиш тенденциясини барқарор деб баҳоланмоқда.
Агентлик 2023 йилда банклардаги кредитлашнинг ўртача ўсишини прогноз қилмоқда. Бу асосан чакана ва тижорат кредитлашнинг ўсиши билан боғлиқ. 2024 йилда кредитлаш янада кўпайиши мумкин. Ўзбекистон банк секторида долларлашув сақланиб қолиши кутилмоқда.
Ҳисоб-китобларга кўра, 2022 йилда Ўзбекистоннинг аҳоли жон бошига ялпи ички маҳсулоти тахминан 2 147 долларни ташкил этган, бу нисбатан пастроқ кўрсаткич.
Агентлик фикрича, аҳоли жон бошига пастроқ бўлган ЯИМ юзага келиши мумкин бўлган стрессли вазиятларга қарши туриш қобилиятини чеклайди.
Бироқ таҳлилчилар аҳолининг реал даромадлари расмий статистикадан маълум даражада юқорироқ бўлиши мумкинлигини таъкидлаган. Бунга мамлакатда катта ҳажмда яширин иқтисодиёт ҳам мавжуд.
S&P Global Ratings — Америка кредит рейтинги агентлиги ва S&P Global компаниясининг акциялар, облигациялар ва товарлар бўйича молиявий тадқиқотлар ва таҳлилларни нашр этадиган бўлими. S&P, Мооdy’s ва Fitch’ни ҳам ўз ичига оладиган Катта учлик кредит рейтинг агентликларининг энг каттаси ҳисобланади.
Изоҳ (0)