Namangan tumani, “Katta Toshbuloq” MFYda joylashgan cho‘yan quyish sexidagi parogenerator (avtoklab)da par bosimi ortib ketishi tufayli portlash sodir bo‘ldi. Bu haqda “Daryo”ga Bosh prokuratura matbuot xizmati xabar berdi.
Ma’lum qilinishicha, voqea 15-fevral kuni soat 19:50 larda yuz bergan. Oqibatda sexda ishlayotgan ikki nafar ishchi tan-jarohati olib, hodisa joyida vafot etgan. Yana bir ishchi kuyish jarohati olib, shifoxonaga yotqizilgan.
Mazkur holat yuzasidan Namangan tuman IIB huzuridagi tergov bo‘linmasi tomonidan Jinoyat kodeksining 257-moddasi 2-qismi “a” bandi (mehnatni muhofaza qilish qoidalarini buzish odam o‘lishiga sabab bo‘lishi) bilan jinoyat ishi qo‘zg‘atildi.
Tergov harakatlari olib borilmoqda.
Izoh (0)