Farg‘ona vodiysi viloyatlarida gaz quyish shoxobchalari faoliyati bosqichma-bosqich tiklanishi mumkin. Bu haqda Energetika vazirligi axborot xizmati xabar berdi.
Xabarga ko‘ra, ko‘rilayotgan choralar natijasida hafta oxirlariga borib vodiy viloyatlaridagi gaz quvurlarida tabiiy gaz bosimining ko‘tarilib borishi kutilmoqda. Shu sababli mahalliy hokimliklar bilan kelishilgan holda avtomobillarga gaz to‘ldirish kompressor shoxobchalari (AGTKSH) gaz bosimining ko‘tarilishiga qarab, ularning faoliyati bosqichma-bosqich tiklanishi rejalashtirilmoqda.
Taʼkidlanishicha, gaz bosimi pasaygan kunlarda birinchi navbatda aholi va ijtimoiy soha obyektlari (issiqlik elektr stansiyalar, shifoxonalar, maktabgacha va maktab hamda oliy taʼlim muassasalari va boshqalar)ni elektr energiyasi va tabiiy gaz bilan bir maromda taʼminlash zarur hisoblangani sababli shoxobchalar faoliyatiga majburiy cheklovlar kiritilgan. Quvurlarda gaz bosimini bir meʼyorga keltirish va ushbu meʼyorni saqlab turish uchun AGTKSHlari qisqa vaqt oralig‘ida reja-grafik asosida faoliyat yuritib boradi.
Izoh (0)