“Sanoat energetika guruhi” O‘zbekiston energetika tizimi haqidagi xabarlarga munosabat bildirdi

“Sanoat energetika guruhi” xorijiy ommaviy axborot vositalari tomonidan O‘zbekiston energetika tizimi haqida noto‘g‘ri ma’lumotlar tarqatilayotganini ma’lum qildi.

Qayd etilishicha, O‘zbekistondagi barcha gaz va neft konlari davlat mulki bo‘lgan va shunday bo‘lib qoladi. “Sanoat energetika guruhi” esa tegishli litsenziyalar asosida ishlab chiqarish faoliyatini amalga oshiradi. Kompaniya O‘zbekistonda neft qazib olishni ko‘paytirish dasturi doirasida ish olib boradi.

Bugungi kunda “SANEG”da 10 mingdan ortiq O‘zbekiston fuqarolari ishlamoqda, shuningdek, 200 ga yaqin yuqori malakali xorijiy mutaxassislar jalb etilgan. 2020—2002-yillarda neft qazib olishni ko‘paytirish dasturi doirasida kompaniya 540 million dollardan ortiq sarmoya kiritdi. Buning natijasida suyuqlik ishlab chiqarish hajmini 42 foizga oshirish borasida ishlarni amalga oshirmoqda.

“Sanoat energetika guruhi” MCHJ o‘z faoliyatini O‘zbekiston Respublikasi qonunchiligiga muvofiq ochiq, oshkora olib boradi. Korxona jamoasi yaqin kelajakda suyuq uglevodorodlar ishlab chiqarishni sezilarli darajada oshirish va korxona oldiga qo‘yilgan barcha vazifalarni bajarish uchun barcha sa’y-harakatlarni amalga oshirmoqda. Kompaniya xalqi farovonligi yo‘lida sohani rivojlantirish, O‘zbekiston yoshlarini kasb-hunarga o‘rgatish, o‘z xodimlari va ularning oila a’zolarini qo‘llab-quvvatlashda davom etadi.