Farg‘onada Turkiya kompaniyasi 1000 MVtli quyosh fotoelektr stansiyasi quradi

Turkiyaning Alarko Holding Altek kompaniyasi Farg‘ona viloyatida yangi loyihalarni amalga oshiradi, deb xabar bermoqda viloyat hokimligi.

Qayd etilishicha, hokim Xayrullo Bozorov kompaniyasi bosh direktori Hakan Aytekinni qabul qilgan. Uchrashuvda Farg‘onada quyosh fotoelektr stansiyasi qurish va ushbu istiqbolli loyihaning moliyaviy jihatlari muhokama qilingan.

Muloqotda Hakan Aytekin kompaniya tomonidan Turkiyada 1000 MVtli loyiha ustida ish olib borilayotgani xususida to‘xtalib o‘tgan. Agar zaruriy sharoitlar yaratilsa, kompaniya tomonidan ushbu tajriba asosida Farg‘onada ham mazkur loyihani amalga oshirishga tayyor ekanini ma’lum qilgan.

Turkiyalik hamkorlar tomonidan bildirilgan mazkur taklif har tomonlama qo‘llab-quvvatlangan hamda viloyatning Beshariq, O‘zbekiston va Farg‘ona tumanlaridan loyiha uchun mos joylar bilan tanishtirish uchun mas’ullar biriktirilgan.

“Uchrashuvda birinchi navbatda loyiha uchun hududlarda joy aniqlash, shundan so‘ng yana uchrashib bu borada birgalikda olib boriladigan sa’y-harakatlar rejasini ishlab chiqishga ham kelishib olindi”, — deyiladi xabarda.