Xabaringiz bor, Turkiyaning janubi-sharqiy viloyatlarida sodir bo‘lgan zilzila salkam 32 ming aholining “yostig‘ini quritdi”. Yuz minglab insonlarning og‘ir tan jarohati olishiga sabab bo‘ldi. Turk xalqi boshiga tushgan voqealar nafaqat xorijlik o‘quvchilar, o‘zbek o‘quvchilarining ham qiziqishini uyg‘otgach, “Daryo” jurnalisti Otabek Qo‘ldoshev 14-fevral kuni Turkiyaning Istanbul shahri orqali Gaziantep viloyatiga yetib bordi va o‘zbek o‘quvchilari uchun qiziq bo‘lgan voqeani ayni hududning o‘zida bo‘lib, yoritishga urindi.
Dastlab Gaziantep viloyati markazida bo‘lgan jurnalist shahar markazidagi ko‘p qavatlar uylar ham qulab tushganiga, bu orqali minglab insonlarga zarar yetganiga guvoh bo‘ldi.
Maʼlum bo‘lishicha, Gaziantep Turkiyadagi mavjud 81 ta viloyatlarning biri bo‘lib, zilziladan katta zarar ko‘rgan hudud bo‘lgan.
“Bizning viloyatimizdagi Nurdag‘i hamda Islahiya tumanlari zilziladan eng ko‘p zarar ko‘rgan hududlar bo‘lib, Nurdag‘i shahri deyarli vayron bo‘lgan. Bu shaharda 60 ming nafar aholi istiqomat qilardi. Shu sabab prezident Rajap Toyyib Erdo‘g‘an bu shahar tekislanib, o‘rniga bir yilda yangi shahar qurilishini bildirdi. Bundan nafaqat biz masʼullar, aholi vakillari ham judayam mamnun bo‘ldik”, — deydi “Daryo” jurnalistiga mazkur maʼlumotlarni to‘plashda ko‘maklashgan masʼullardan biri Jafer Yilmaz.
Gaziantep shahar hokimiyati yong‘in xavfsizligi boshqarmasi boshlig‘i Jafer Yilmazning maʼlumot berishicha, Turkiyada sodir bo‘lgan zilzilaning kuchidan 10 ta viloyatda yashovchi 13 million kishidan ortiq aholi zarar ko‘rgan.
“Shu 10 ta viloyatda yashovchi 13 milliondan ortiq aholi zilziladan zarar ko‘rdi. Yaqinlarini yo‘qotdi, mulkidan ayrildi. Biroq davlatimiz mehribon va ularni qo‘llab-quvvatlamoqda. Yangi qurilajak shaharning barcha xarajatlari davlat hisobidan amalga oshiriladi va uy-joyidan ayrilgan qardoshlarimizga yangi uylar tortiq qilinadi”, — deydi Jafar Yilmaz.
“Daryo” jurnalisti Otabek Qo‘ldoshevning kuzatuvlariga ko‘ra, Nurdag‘i shahridagi ko‘p qavatli uylarning deyarli barchasi qulagan. Qulamaganlarida esa katta yorilishlar paydo bo‘lgan. Shu sabab bu shahar aholisi uylarini tark etmoqda.
“Daryo” internet nashri sayt jurnalistining axborot to‘plashiga ko‘maklashayotgan Turkiya Respublikasi prezidenti huzuridagi Kommunikatsiyalar boshqarmasining Toshkent elchixonasi Kommunikatsiyalar bo‘yicha maslahatchisi Hamdi Turshujuga, Gaziantep shahar hokimiyati yong'in xavfsizligi boshqarmasi boshlig'i Jafer Yilmaz va mudurlarga o‘z minnatdorligini bildiradi.
“Daryo” Turkiyadagi zilzila o‘choqlaridan turkum materiallar e‘lon qilishda davom etadi.
Izoh (0)