Bosh prokurorga energetika nazorati bo‘yicha o‘rinbosar tayinlanadi

O‘zbekistonda Bosh prokurorga energetika nazorati bo‘yicha o‘rinbosar tayinlanadi. Bu haqda O‘zA xabar berdi.

Qayd etilishicha, bosh prokurorning yoqilg‘i-energiya resurslaridan foydalanish sohasida qonunchilikka rioya etilishi va uning ijrosi ustidan nazoratni amalga oshirishga mas’ul bo‘lgan o‘rinbosari lavozimi kiritladi.

Shavkat Mirziyoyevning “Yoqilg‘i-energiya resurslaridan foydalanish sohasida davlat nazorati samaradorligini oshirish chora-tadbirlari to‘g‘risida”gi qarori bilan bosh prokuror o‘rinbosari:

• “O‘zenergoinspeksiya” zimmasiga yuklangan vazifa va funksiyalarni bajarishga amaliy yordam ko‘rsatadi;
• Bosh prokuratura huzuridagi Majburiy ijro byurosi va Iqtisodiy jinoyatlarga qarshi kurashish departamenti faoliyatini muvofiqlashtiradi.

Bosh prokuratura ikki hafta muddatda yoqilg‘i-energiya resurslaridan foydalanish ustidan davlat nazoratini samarali tashkil etish bo‘yicha takliflarni Prezident Administrasiyasiga kiritadi.

“O‘zenergoinspeksiya” va uning hududiy boshqarmalari faoliyatini mazkur qaror bilan belgilangan ustuvor yo‘nalishlar asosida yanada takomillashtirish bo‘yicha kompleks chora-tadbirlarni samarali amalga oshirish mas’uliyati shaxsan energetika vaziri Jo‘rabek Mirzamahmudov va bosh prokuror o‘rinbosari zimmasiga yuklanadi.