Бош прокурорга энергетика назорати бўйича ўринбосар тайинланади

Ўзбекистонда Бош прокурорга энергетика назорати бўйича ўринбосар тайинланади. Бу ҳақда ЎзА хабар берди.

Қайд этилишича, бош прокурорнинг ёқилғи-энергия ресурсларидан фойдаланиш соҳасида қонунчиликка риоя этилиши ва унинг ижроси устидан назоратни амалга оширишга масъул бўлган ўринбосари лавозими киритлади.

Шавкат Мирзиёевнинг “Ёқилғи-энергия ресурсларидан фойдаланиш соҳасида давлат назорати самарадорлигини ошириш чора-тадбирлари тўғрисида”ги қарори билан бош прокурор ўринбосари:

• “Ўзэнергоинспекция” зиммасига юкланган вазифа ва функцияларни бажаришга амалий ёрдам кўрсатади;
• Бош прокуратура ҳузуридаги Мажбурий ижро бюроси ва Иқтисодий жиноятларга қарши курашиш департаменти фаолиятини мувофиқлаштиради.

Бош прокуратура икки ҳафта муддатда ёқилғи-энергия ресурсларидан фойдаланиш устидан давлат назоратини самарали ташкил этиш бўйича таклифларни Президент Администрасиясига киритади.

“Ўзэнергоинспекция” ва унинг ҳудудий бошқармалари фаолиятини мазкур қарор билан белгиланган устувор йўналишлар асосида янада такомиллаштириш бўйича комплекс чора-тадбирларни самарали амалга ошириш масъулияти шахсан энергетика вазири Жўрабек Мирзамаҳмудов ва бош прокурор ўринбосари зиммасига юкланади.