Surxondaryo viloyati Termiz shahrida firibgarlik jinoyatini sodir etgan 50 yoshli erkak oltinchi marta qamaldi. Bu haqda O‘zA xabar berdi.
Xabarga ko‘ra, 50 yoshli erkak A.J. 15 yil davomida bir xil jinoyat — firibgarlik bilan besh marotaba sudlangan. Unga har gal sud tomonidan turli yengilliklar berilgan: tomonidan ozodlikni cheklash jazosi, axloq tuzatish ishi jazosi qo‘llanilgan. Biroq u 2022-yil yana jinoyat sodir etib, sudlandi.
A.J. tanishiga tegishli bo‘lgan avtomashinada meva sotish bilan shug‘ullanib kelgan. Tanishiga agar uni mashinasi bilan aytgan joyiga olib borsa kuniga 200 ming so‘mdan berishini va’da qilgan. Bir oyda va’da bo‘yicha unga 5 million 750 ming so‘m berishi kerak bo‘lgan. Lekin A.J. pullarni bermay uni chuv tushirgan.
Bundan tashqari, u yana bir tanishidan bir haftada qaytarish sharti bilan 12 million so‘mdan ortiq pul olgan. Lekin pulni qaytarmay, o‘z ehtiyojlariga ishlatib yuborgan. Shu bilan birga, A.J. meva yetishtirish bilan shug‘ullanib kelgan Angor tumanida yashovchi dehqonlarni ham chuv tushirib, ularga 53 million 736 ming 200 so‘m miqdorida moddiy zarar yetkazadi.
Undan zarar ko‘rganlar huquqni muhofaza qiluvchi idoralarga murojaat qilgan. Shundan so‘ng A.J.ga nisbatan oltinchi bor jinoyat ishi qo‘zg‘atilgan. Sudda ayblanuvchi aybiga iqrorlik bildirib, pushaymon ekanini bildirgan. Jinoyat ishlari bo‘yicha Angor tumani sudi unga nisbatan tegishli jazo chorasi tayinladi.
Izoh (0)