Toshkent viloyati Chirchiq shahridagi 4-sonli maktab binosining poydevori cho‘kib, devorlari yorildi. Qurilish va uy-joy kommunal xo‘jaligi vazirligi axborot xizmati holat yuzasidan munosabat bildirdi.
Qayd etilishicha, obyektda shu kunga qadar nazorat inspeksiyasi tomonidan muntazam tekshirish olib borilib, qurilish-montaj ishlari sifati ustidan pudratchi, loyihachiga 2-marta yozma ko‘rsatma berilgan hamda ular ijrosi ta’minlangan.
Keyinroq obyektni foydalanishga topshirish bo‘yicha ishchi komissiya a’zolari va inspeksiya tomonidan berilgan kamchiliklar pudratchi tomonidan to‘liq bartaraf etilmagani sababli hozirgi kunda ushbu foydalanishga topshirish bayonnomasi inspeksiya tomonidan rasmiylashtirilmagan.
Binoning tashqi devoridagi yoriqlar sabab tom qismidan tushayotgan yomg‘ir suvlari binoning poydevor qismiga ketayotganligi oqibatida poydevorda cho‘kish yuzaga kelgan. Bugungi kunda yuzaga kelgan yoriqlar pudratchi tomonidan ta’mirlangan. Pudratchiga bahorgi ta’til vaqtida qayta to‘liq ta’mirlash bo‘yicha ko‘rsatma ham taqdim etilgan.
Qurilish obyektida ishlab chiqilgan va tasdiqlangan ishchi loyiha hujjatlariga asosan 120 o‘rinli qo‘shimcha bino qurilishi ko‘rsatilgan bo‘lib, ushbu bino qurilishi bosh rejada ko‘rsatilgan hududda ko‘p yillik daraxtlarni kesishning imkoni bo‘lmaganligi sababli avval belgilangan joydan boshqa yerga ko‘chirilgan. Qurilish jarayonida kiritilgan o‘zgartirishlarga buyurtmachi tomonidan 2020-yil mart oyida bayonnoma rasmiylashtirilgan.
Izoh (0)