Toshkent shahri Mirzo Ulug‘bek tumanida yangi qurilgan ko‘p qavatli uy ichidan darz ketgani haqida xabar berilgandi. Tuman hokimligi holat yuzasidan qo‘shimcha ma’lumot berdi.
Mirzo Ulug‘bek tumani Mag‘rur ko‘chasi 55B-uy manzilida joylashgan ushbu uy xususiy uy joy sifatida “Quyun” mas’uliyati cheklangan jamiyati rahbari A.Zokirov va boshqalar tomonidan qurilgan va fuqarolarga bo‘lib-bo‘lib sotilgan.
Qurilish vazirligining ma’lum qilishicha, ushbu bino ko‘p kvartirali uy-joy sifatida qurilish me’yor va talablari asosida qurilmagan. Hozirda ushbu bino vakolatli loyiha institutlari tomonidan o‘rganilmoqda. Natijalar haqida qo‘shimcha axborot taqdim qilinadi.
2022-yil 18-yanvar kuni Mirzo Ulug‘bek tuman prokuraturasi tomonidan “Quyun” MCHJ rahbari A.Zokirov va boshqalarga nisbatan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) 4-qismi “a”, “b” bandlari, 168-moddasi (firibgarlik) 4-qismi “a” bandi va 229-moddasi (o‘zboshimchalik) bilan jinoyat ishi qo‘zg‘atilgan.
Jinoyat ishida to‘plangan hujjatlarga ko‘ra, A.Zokirov akasi R.Zokirov bilan Mag‘rur ko‘chasi, 55B-uy va boshqa manzillarda shaharsozlik normalari va qoidalarini jiddiy ravishda buzgan holda 3 qavatdan iborat bo‘lgan sifasiz uylarni qurib, aldov yo‘li bilan fuqarolarga sotgan. Yuqoridagi holatlar bo‘yicha sud hukmi bilan A.Zokirovga 8 yil 2 oy muddatga ozodlikdan mahrum qilish jazosi tayinlangan. Akasi R.Zokirov tergovdan yashiringanligi sababli unga qidiruv e’lon qilingan. Fuqarolarga to‘lanadigan kompensatsiya masalasi Toshkent shahar sudi apellyatsiya instansiyasida ko‘rilmoqda.
Izoh (0)