Adliya vazirining “Patent egasining ochiq litsenziyaga huquq berish haqidagi arizasini ko‘rib chiqish va ushbu ariza to‘g‘risidagi ma’lumotlarni e’lon qilish qoidalarini tasdiqlash to‘g‘risida”gi buyrug‘i qabul qilindi.
Ixtiro, foydali model, sanoat namunasi, o‘simliklarning yangi navi, hayvonlarning yangi zotiga berilgan patentlar egalarining ochiq litsenziyaga huquq berish haqidagi arizalari davlat tilida Adliya vazirligining “Sanoat mulki muhofazasi portali” orqali yuboriladi.
Hujjatga ko‘ra, ochiq litsenziya bo‘yicha ariza haqidagi ma’lumotlarni e’lon qilish uchun rezidentlar BHMning 20 foiz, norezidentlar BHMning 3,5 baravari miqdorida davlat boji to‘laydi.
Arizaga quyidagilar ilova qilinadi:
- ishochnoma (ariza vakil yoki patent vakili tomonidan berilganda);
- bir nechta patent egalari bo‘lganda ularning roziligi.
Yuridik shaxslarning arizalari yuridik shaxsning rahbari tomonidan imzolanadi. Davlat boji to‘langani haqidagi ma’lumot Adliya vazirligi tomonidan mustaqil tekshiriladi.
Adliya vazirligi tizim orqali patent egasini ariza qabul qilib olingani haqida xabardor qiladi va vazirlikning rasmiy axborotnomasida tegishli ixtiro, foydali model, sanoat namunasi, o‘simliklarning yangi navi, hayvonlarning yangi zoti haqida ma’lumotlarni e’lon qiladi.
Rasmiy axborotnomada e’lon bergandan so‘ng Adliya vazirligi 3 kun ichida patent egasida tegishli yozuvlar aks ettirilgan “Patentga ilova” yuboradi. Hujjat Qonunchilik ma’lumotlari milliy bazasida e’lon qilingan va 7-fevraldan kuchga kirgan.
Izoh (0)