Prezident Shavkat Mirziyoyev 10-fevral kuni Jizzax viloyatiga tashrifi chog‘ida sanoatni rivojlantirish va qayta tiklanuvchi energiya manbalari masalalarida yig‘ilish o‘tkazdi. Yig‘ilish davomida davlat rahbari jizzaxlik yoshlar, tadbirkorlar va faollar bilan ham muloqotda bo‘ldi.
Ulardan biri Jizzax viloyati, Paxtakor tumanidagi Silverleafe qo‘shma korxonasi John Deere kombayni operatori Dilchehra Ergashevadir. Dilchehra prezidentga o‘qish bilan birgalikda ishini ham olib borayotganini aytib, 2022-yilgi g‘alla mavsumida 4500 tonna g‘allani kombaynda o‘rgani haqida gapirdi. Shuningdek, Dilchehra Ergasheva o‘tgan yili paxta mavsumida 2562 tonna paxtani terishda o‘z hissasini qo‘shganini aytdi. Uning aytishicha, orttirgan tajribalari asosida Dilchehra kelgusi paxta mavsumida 50-60 tonna paxta teradi.
Dilchehra Ergashevadan davlat rahbari bilan muloqot, uning hissiyotlari va kelgusi rejalari haqida so‘radik.
“Oldinlari ayol ishi texnika haydasa, hamma hayratlanib qarardi. Hozir yurtimizda ayollar yengil va og‘ir mashinalarni haydayapti, kranlarni boshqaryapti. Shu sohaga men ham qiziqib, kombayn haydashni o‘rgandim. Mana 3 yildirki, o‘qish bilan birgalikda Silverleafe klassterida traktor, kombayn haydab kelmoqdaman.
O‘tgan yili g‘alla o‘rimida 4500 tonna g‘alla hosilini yig‘ib, yurtimiz xirmoniga hissa qo‘shdim. 2022-yilning 30-iyun kuni “Yangi O‘zbekiston” bog‘ida Yoshlar kuniga bag‘ishlab o‘tkazilgan tadbirda prezidentimiz meni “Kelajak bunyodkori” medali bilan taqdirladi, bundan juda ham xursandman. Kichik ishimga yuksak baho berib, shunday mukofotga loyiq deb topgani uchun Prezidentga rahmat aytaman.
Biz 2022-yil paxta mavsumida 2562 tonna paxta hosilini yig‘ib, o‘z hissamni qo‘shdim. 1 kunda 40-50 tonna paxta hosilini AQSHning John Deere kombayni orqali terdim. Bir kunda ming nafar ishchining ishini bajardim deb o‘ylayman, chunki bir kishi 100 kilogrammdan terganda, shuncha bo‘ladi. Oldinlari texnika mehnatga jalb qilinguncha o‘zimiz dalalarda paxta terib, darslardan qolib ketardik. Bir kunda 100 kg emas, 50-60 kg yig‘ardik. Yurtimizda zamonaviy klassterlar yo‘lga qo‘yilgach, og‘ir mehnatdan voz kechila boshlandi. Chetdan mana shunday kombaynlar olib kelindi.
Hurmatli prezidentimiz bilan yaxshi muloqot bo‘ldi. Uchrashuvdan so‘ng yanada ko‘p masʼuliyatga ega bo‘ldim va motivatsiya, kuch oldim deb o‘ylayman. Xudo xohlasa, maqsadlarim ko‘p. Prezidentimizga aytib o‘tganimdek, magistratura va doktorantura bosqichlarida tahsil olib, egallagan bilim va tajribalarim asosida ilmiy ish qilmoqchiman. Qishloq xo‘jaligini rivojlantirishda hissamni qo‘shmoqchiman. O‘zim tengi va yosh qizlar texnikalarni haydashga qiziqsa, qo‘limdan kelgancha yordam berishga tayyorman.
3 yildan beri kombayn haydab kelyapman. Ilk bor ishga kelganimda Silverleafe qo‘shma korxonasi direktori Den Peterson bilan suhbat qurganman va keyin ishga qabul qilinganman. Birinchi ish kunimdanoq tushlikkacha nazariy, tushlikdan keyin amaliy ish qilganman. Dastlab lazerli yer tekislash traktori orqali o‘rganganman. Paxta mavsumiga kelib ulkan kombaynlar haydashni o‘rgana boshladim. Mana 3 yildirki, g‘alla, jo‘xori va paxta o‘rimida mana shunday kombaynlarni haydab kelyapman.
Uydagilar boshida qarshilik qilishgan. Ulkan texnikani ko‘rib qo‘rqishgan, o‘zim ham qo‘rqqanman. Chunki ovozi tashqaridan juda vahimali eshitiladi, ichida esa umuman ovoz ham eshitilmaydi, sizda xavotir uyg‘otmaydi. Keyin otamga aytganimda: “Qo‘lingdan kelsa, o‘zingga ishonsang, harakat qilib ko‘r”, deganlar. Hozir, Allohga shukrki, hammasi yaxshi. Menga ishonishadi”, — deydi Dilchehra Ergasheva.
Prezident bilan muloqotda bo‘lgan yana bir jizzaxlik tadbirkor – Feruza Umarova. U davlat rahbariga 2021-yili 5 nafar bola bilan yolg‘iz qolib ketgani, keyin esa “Ayollar daftari” tizimi orqali 30 mln so‘m kredit ajratilgani haqida gapirdi. Feruza Umarovaning so‘zlariga ko‘ra, unga Sharof Rashidov tumanidan 2 oyga hech qanday to‘lovlarsiz bino ajratib berilgan. U o‘ziga ajratilgan kredit orqali 6 ta kompyuter xarid qilib, o‘z ishini boshlagan. Bugunga kelib Feruza Umarova o‘quv-markaz rahbari hisoblanadi.
Feruza Umarovadan prezident bilan muloqot qanday o‘tgani haqida so‘radik. U “Ayollar daftari” o‘zi kabi insonlar uchun yaratilgan, deya taʼkidladi.
“5 nafar bolasi bor ona sifatida “Ayollar daftari” shakllantirilishi, farzandlarim uchun esa “Yoshlar daftari”ni shakllantirilgach, uyimga kuchli beshtalik kirib keldi, desam xato bo‘lmaydi. Sababi kuchli besh tizim qo‘limdan nima kelishini so‘radi. Hayron bo‘lib qarab tursam, biz sizga kredit beramiz deyishdi. “Kredit olgandan keyin uni to‘lash kerak-ku” desam, “olgach o‘rganasiz-da”, deyishdi. Mahallada joylashgan noturar joy binosi – bo‘m-bo‘sh binoni menga 2 oylik imtiyozli davrga ijara shartnomasi asosida berishdi. 6 ta kompyuter bilan o‘quv markaz tashkil etishimga ko‘maklashishdi. Ushbu tizim orqali 6 ta kompyuter bilan ish boshlagan Magical Study o‘quv markazi hozirgi kunda 22 ta yo‘nalishda faoliyat olib bormoqda. Bu degani 22 ta doimiy ishchi o‘rni yaratildi.
Bu tizim orqali o‘quv markazim onlayn mahalla platformasi, “Yoshlar daftari” platformasi hamda http://kasbtalim.uz/ platformasiga kiritildi. Bandlikka ko‘maklashish markazi, yaʼni Sharof Rashidov tumani bilan shartnoma asosida ayollar, bolalar va erkaklarni o‘qitishni boshladim. Hozirga qadar 2 yil davomida 840 nafar fuqaroni o‘qitdim.
Olingan daromadim hisobidan yana bitta ish boshladim. Fermer xo‘jaligini yaratib, u yerda eksport uchun olma, bodom yong‘og‘i yetishtirdim. O‘sha yerdagi aholi bilan kelishgan holda olmani sug‘orib, tagini chopishni yo‘lga qo‘ydik. Tagiga sabzi, kartoshka, karam, kadi ekdik. Shuni hisobidan qishloq aholisi ro‘zg‘origa ozgina bo‘lsada mablag‘ kirdi. Menga ham mablag‘ tushdi. Aylanma mablag‘im 500 million so‘mga yetdi.
Lekin yana bo‘sh o‘tirmadim, Boyqo‘ng‘ir hududida joylashgan E-auksion‘ga chiqqan 66 sotix yerni sotib oldim. Endi fevral oyi oxirida u yerda ekoturizmni yo‘lga qo‘yaman. Sababi joylashuv lokatsiyasi juda chiroyli – Qirqiz tog‘i. U yerda qizil jar va katta quyuq o‘rmon bor. Men hozirgi holatda Yangi O‘zbekistondan juda minnatdorman. Xonadonimga kirib kelgan O‘zbekiston yangi tizimiga kim ishonmasa, bemalol, Sharof Rashidov tumani, “Istiqlol” mahallasiga kelib, ishimni ko‘rishsin, o‘rganishsin. Islohot va tizim haqiqatan ishlayapti, faqat undan to‘g‘ri foydalanishni bilsak bo‘ldi”, — deydi Feruza Umarova.
Izoh (0)