Президент Шавкат Мирзиёев 10 февраль куни Жиззах вилоятига ташрифи чоғида саноатни ривожлантириш ва қайта тикланувчи энергия манбалари масалаларида йиғилиш ўтказди. Йиғилиш давомида давлат раҳбари жиззахлик ёшлар, тадбиркорлар ва фаоллар билан ҳам мулоқотда бўлди.
Улардан бири Жиззах вилояти, Пахтакор туманидаги Silverleafe қўшма корхонаси John Deere комбайни оператори Дилчеҳра Эргашевадир. Дилчеҳра президентга ўқиш билан биргаликда ишини ҳам олиб бораётганини айтиб, 2022 йилги ғалла мавсумида 4500 тонна ғаллани комбайнда ўргани ҳақида гапирди. Шунингдек, Дилчеҳра Эргашева ўтган йили пахта мавсумида 2562 тонна пахтани теришда ўз ҳиссасини қўшганини айтди. Унинг айтишича, орттирган тажрибалари асосида Дилчеҳра келгуси пахта мавсумида 50-60 тонна пахта теради.
Дилчеҳра Эргашевадан давлат раҳбари билан мулоқот, унинг ҳиссиётлари ва келгуси режалари ҳақида сўрадик.
“Олдинлари аёл иши техника ҳайдаса, ҳамма ҳайратланиб қарарди. Ҳозир юртимизда аёллар енгил ва оғир машиналарни ҳайдаяпти, кранларни бошқаряпти. Шу соҳага мен ҳам қизиқиб, комбайн ҳайдашни ўргандим. Мана 3 йилдирки, ўқиш билан биргаликда Silverleafe класстерида трактор, комбайн ҳайдаб келмоқдаман.
Ўтган йили ғалла ўримида 4500 тонна ғалла ҳосилини йиғиб, юртимиз хирмонига ҳисса қўшдим. 2022 йилнинг 30 июнь куни “Янги Ўзбекистон” боғида Ёшлар кунига бағишлаб ўтказилган тадбирда президентимиз мени “Келажак бунёдкори” медали билан тақдирлади, бундан жуда ҳам хурсандман. Кичик ишимга юксак баҳо бериб, шундай мукофотга лойиқ деб топгани учун Президентга раҳмат айтаман.
Биз 2022 йил пахта мавсумида 2562 тонна пахта ҳосилини йиғиб, ўз ҳиссамни қўшдим. 1 кунда 40-50 тонна пахта ҳосилини АҚШнинг John Deere комбайни орқали тердим. Бир кунда минг нафар ишчининг ишини бажардим деб ўйлайман, чунки бир киши 100 килограммдан терганда, шунча бўлади. Олдинлари техника меҳнатга жалб қилингунча ўзимиз далаларда пахта териб, дарслардан қолиб кетардик. Бир кунда 100 кг эмас, 50-60 кг йиғардик. Юртимизда замонавий класстерлар йўлга қўйилгач, оғир меҳнатдан воз кечила бошланди. Четдан мана шундай комбайнлар олиб келинди.
Ҳурматли президентимиз билан яхши мулоқот бўлди. Учрашувдан сўнг янада кўп масъулиятга эга бўлдим ва мотивация, куч олдим деб ўйлайман. Худо хоҳласа, мақсадларим кўп. Президентимизга айтиб ўтганимдек, магистратура ва докторантура босқичларида таҳсил олиб, эгаллаган билим ва тажрибаларим асосида илмий иш қилмоқчиман. Қишлоқ хўжалигини ривожлантиришда ҳиссамни қўшмоқчиман. Ўзим тенги ва ёш қизлар техникаларни ҳайдашга қизиқса, қўлимдан келганча ёрдам беришга тайёрман.
3 йилдан бери комбайн ҳайдаб келяпман. Илк бор ишга келганимда Silverleafe қўшма корхонаси директори Ден Петерсон билан суҳбат қурганман ва кейин ишга қабул қилинганман. Биринчи иш кунимданоқ тушликкача назарий, тушликдан кейин амалий иш қилганман. Дастлаб лазерли ер текислаш трактори орқали ўрганганман. Пахта мавсумига келиб улкан комбайнлар ҳайдашни ўргана бошладим. Мана 3 йилдирки, ғалла, жўхори ва пахта ўримида мана шундай комбайнларни ҳайдаб келяпман.
Уйдагилар бошида қаршилик қилишган. Улкан техникани кўриб қўрқишган, ўзим ҳам қўрққанман. Чунки овози ташқаридан жуда ваҳимали эшитилади, ичида эса умуман овоз ҳам эшитилмайди, сизда хавотир уйғотмайди. Кейин отамга айтганимда: “Қўлингдан келса, ўзингга ишонсанг, ҳаракат қилиб кўр”, деганлар. Ҳозир, Аллоҳга шукрки, ҳаммаси яхши. Менга ишонишади”, — дейди Дилчеҳра Эргашева.
Президент билан мулоқотда бўлган яна бир жиззахлик тадбиркор – Феруза Умарова. У давлат раҳбарига 2021 йили 5 нафар бола билан ёлғиз қолиб кетгани, кейин эса “Аёллар дафтари” тизими орқали 30 млн сўм кредит ажратилгани ҳақида гапирди. Феруза Умарованинг сўзларига кўра, унга Шароф Рашидов туманидан 2 ойга ҳеч қандай тўловларсиз бино ажратиб берилган. У ўзига ажратилган кредит орқали 6 та компьютер харид қилиб, ўз ишини бошлаган. Бугунга келиб Феруза Умарова ўқув-марказ раҳбари ҳисобланади.
Феруза Умаровадан президент билан мулоқот қандай ўтгани ҳақида сўрадик. У “Аёллар дафтари” ўзи каби инсонлар учун яратилган, дея таъкидлади.
“5 нафар боласи бор она сифатида “Аёллар дафтари” шакллантирилиши, фарзандларим учун эса “Ёшлар дафтари”ни шакллантирилгач, уйимга кучли бешталик кириб келди, десам хато бўлмайди. Сабаби кучли беш тизим қўлимдан нима келишини сўради. Ҳайрон бўлиб қараб турсам, биз сизга кредит берамиз дейишди. “Кредит олгандан кейин уни тўлаш керак-ку” десам, “олгач ўрганасиз-да”, дейишди. Маҳаллада жойлашган нотурар жой биноси – бўм-бўш бинони менга 2 ойлик имтиёзли даврга ижара шартномаси асосида беришди. 6 та компьютер билан ўқув марказ ташкил этишимга кўмаклашишди. Ушбу тизим орқали 6 та компьютер билан иш бошлаган Magical Study ўқув маркази ҳозирги кунда 22 та йўналишда фаолият олиб бормоқда. Бу дегани 22 та доимий ишчи ўрни яратилди.
Бу тизим орқали ўқув марказим онлайн маҳалла платформаси, “Ёшлар дафтари” платформаси ҳамда ҳттп://касбталим.уз/ платформасига киритилди. Бандликка кўмаклашиш маркази, яъни Шароф Рашидов тумани билан шартнома асосида аёллар, болалар ва эркакларни ўқитишни бошладим. Ҳозирга қадар 2 йил давомида 840 нафар фуқарони ўқитдим.
Олинган даромадим ҳисобидан яна битта иш бошладим. Фермер хўжалигини яратиб, у ерда экспорт учун олма, бодом ёнғоғи етиштирдим. Ўша ердаги аҳоли билан келишган ҳолда олмани суғориб, тагини чопишни йўлга қўйдик. Тагига сабзи, картошка, карам, кади экдик. Шуни ҳисобидан қишлоқ аҳолиси рўзғорига озгина бўлсада маблағ кирди. Менга ҳам маблағ тушди. Айланма маблағим 500 миллион сўмга етди.
Лекин яна бўш ўтирмадим, Бойқўнғир ҳудудида жойлашган E-auksionъга чиққан 66 сотих ерни сотиб олдим. Энди февраль ойи охирида у ерда экотуризмни йўлга қўяман. Сабаби жойлашув локацияси жуда чиройли – Қирқиз тоғи. У ерда қизил жар ва катта қуюқ ўрмон бор. Мен ҳозирги ҳолатда Янги Ўзбекистондан жуда миннатдорман. Хонадонимга кириб келган Ўзбекистон янги тизимига ким ишонмаса, бемалол, Шароф Рашидов тумани, “Истиқлол” маҳалласига келиб, ишимни кўришсин, ўрганишсин. Ислоҳот ва тизим ҳақиқатан ишлаяпти, фақат ундан тўғри фойдаланишни билсак бўлди”, — дейди Феруза Умарова.
Изоҳ (0)