Qashqadaryo viloyatining Yakkabog tumani hokimligi xodimi qurilish firmasi vakilidan 370 million so‘mni noqonuniy tarzda olayotganida ushlandi. Bu haqda O‘zA xabar berdi.
Aniqlanishicha, mazkur shaxs Yakkabog‘ tumanidagi ikkita maktabgacha taʼlim tashkilotida rejalashtirilgan 5 milliard 250 million so‘mlik kapital taʼmirlash ishlarini amalga oshirish bo‘yicha loyihani tenderda yutib berish evaziga ushbu summaning 7 foizini talab qilgan.
DXX Qashqadaryo viloyati bo‘yicha boshqarmasi xodimlari tomonidan viloyat IIB hamda Iqtisodiy jinoyatlarga qarshi kurashish departamenti viloyat boshqarmasi bilan hamkorlikda o‘tkazilgan tezkor tadbirda so‘ralgan pulni olayotganida qo‘yga tushgan.
Shuningdek, tezkor surishtiruv harakatlari davomida ushbu noqonuniy ishga aloqador bo‘lgan Yakkabog‘ tumani maktabgacha taʼlim bo‘limi xodimi ham ushlangan.
Hozirda holat yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Izoh (0)