Ijtimoiy tarmoqlarda Turkiyada zilziladan talafot ko‘rganlarga yuborilgan insonparvarlik yordamlari, xususan, kiyim-kechaklarning eski va yaroqsizligi, mavsumiy emasligi, ko‘chada sochilib yotgani aks etgan videolar tarqaldi. “Yoshlar kelajagimiz jamg‘armasi” matbuot xizmati rahbari Abrorbek Maʼrufjanov o‘zbekistonliklar tomonidan yuborilayotgan xayriya yordamlari koordinatsiyasi haqida “Hudud24”ga maʼlumot berdi.
“Turkiyaga insonparvarlik yordami sifatida birinchi galda oziq-ovqat mahsulotlari, bolalar tagliklari va issiq yoping‘ichlar yuborildi. Yordamga oshiqqan fuqarolarimizning farosati yuqori. Eski kiyimlar deyarli yo‘q”, — degan u.
Abrorbek Maʼrufjanov hammasi nazoratda ekanligini qayd etib, narsalar saralanib, bosqichma-bosqich yuborilayotganini, hozirda isitish pechlari, generatorlar, fonarlar jo‘natilganini bildirdi.
Savdo-sanoat palatasi bergan so‘nggi axborotga ko‘ra, hozirgacha o‘zbekistonliklar yordami bilan turk xalqi uchun kerakli mahsulotlar to‘ldirilgan 25 ta yuk mashinasi (taxminan 550 ta poddon) jo‘natilgan.
Turkiyadagi zilziladan jabr ko‘rganlar uchun moddiy yordam to‘plash 8-fevraldan Toshkentning Yakkasaroy tumanida joylashgan To‘qimachilik instituti texnoparkida amalga oshirilayotgandi.
Shavkat Mirziyoyevning topshirig‘iga asosan Tashkent Index majmuasi Turkiyaga yuboriladigan insonparvarlik yordami ko‘rinishadagi mahsulotlar yig‘iladigan asosiy baza bo‘ladi.
Izoh (0)