Namanganlik Dildora Habibullayeva Namangan davlat universiteti filologiya fakultetining birinchi bosqichida tahsil oladi. U Navoiyning 100 ta g‘azalini yod olgan, endi esa “Xamsa”ni o‘rganishga bel bog‘lagan. “Daryo” muxbiri Azizbek Abduvaliyev kelgusida navoiyshunos olima bo‘lishni orzu qilayotgan talaba bilan suhbatlashdi.
“G‘azallarni faqat yodlash emas, ularning maʼnosini ham anglash kerak”
“Yoshim 18 da, Namangan tumanining Tepaqiyot qishlog‘idanman. Adabiyotga, Navoiyga qiziqishim maktab ostonasini hatlamay turib, 5-6 yoshimdan boshlangan. Chunki oyim adabiyot o‘qituvchisi, uyimiz to‘la kitob, bobom dutor chalib, Navoiy, Mashrab g‘azallarini xirgoyi qilib berardi.
Men ham, mendan keyingi ikki singlim ham shunday muhitda ulg‘ayganmiz, bu qiziqish qon-qonimizga singib ketgan. Avval maktab darsliklarida berilgan g‘azallarni yod oldim, keyinchalik mustaqil ravishda devonlarni o‘qishga kirishdim. Bilimlar bellashuvlari, fan olimpiadalari, turli tanlovlarda ishtirok etdim.
Respublika miqyosida “Navoiy vorislari” tanlovi o‘tkazilayotgani haqida eshitib, unda qatnashishga ahd qildim, yodlagan g‘azallarim sonini ko‘paytirdim. Albatta, quruq yodlash bilan ish bitmaydi, lug‘at titkilab, ularning maʼnosini o‘rganish, tahlil qilishga ham urindim. Maktab, tuman saralashlaridan o‘tib, viloyat bosqichida ikkinchi o‘rinni olib qaytdim. Ko‘zlangan marra bo‘lmadi, lekin harakatdan to‘xtamadim.
Nihoyat, 2018-yili viloyatda g‘olib bo‘lib, Navoiy shahrida o‘tkazilgan respublika tanloviga yo‘l oldim va sovrindorlar qatoridan o‘rin oldim. O‘sha payt 100 ta g‘azalni yoddan bilardim, hozir ularning soni 125 dan oshdi. Endi esa “Xamsa”ni o‘rganishga kirishmoqchiman. Bunda, albatta, ustozlarim, xususan, Namangan tumanidagi 24-umumtaʼlim maktabi ona tili va adabiyot o‘qituvchisi Hidoyat Polvonova, NamDU dotsenti Farida Karimovadan olgan saboqlarimga tayanaman.
Bolalik paytlarim Navoiy g‘azallarini aytib bersam ayrim tengdoshlarimga erish tuyulardi, bundan o‘shanda o‘ksingan paytlarim ham bo‘lgan. Lekin bugunga kelib anglab yetdimki, hazrat ijodiga qiziqish tufayli juda ko‘p narsalarga erishibman. Ozmi-ko‘pmi tanildim, do‘stlar orttirdim, tanlovlarda g‘olib bo‘ldim, shu sohaning etagini tutdim. Kelajakda Navoiy ijodini tadqiq etishda davom etib, ustozlarim kabi yetuk olima, professor bo‘laman”, — deydi suhbatdosh.
“Hozir faqat ertaklarni ifodali o‘qib beryapmiz, xolos”
NamDU dotsenti Farida Karimova “Navoiy vorislari” tanlovi hayʼat aʼzosi bo‘lgan paytlaridan tirishqoq va izlanuvchan qizni ko‘z ostiga olgandi. Bugungi kunga kelib Dildora filologiya fakultetida, qo‘l ostida tahsil olmoqda. Bu esa unga bilganlarini o‘rgatish va katta maqsadlarga chorlash imkoniyatini yanada kengaytirdi.
“Navoiy g‘azallarini yod olish va anglab yetish oson vazifa emas, kishidan maʼlum bir tayyorgarlikni talab qiladi. Chunki ularda arabiy va forsiy so‘zlar, yashirin maʼnolar ko‘p. Shu uchun bunga bel bog‘lagan yoshlarni har qancha olqishlasa, qo‘llab-quvvatlasa arziydi. Afuski, hozirgi paytda bolalarimizga faqat ertaklarni ifodali o‘qib beryapmiz xolos. Aslida ularga esini tanigan paytdan Navoiy, Bobur va boshqa buyuklarimiz ijodidan namunalarni aytib, yodlatib borsak, ko‘proq narsaga erishgan bo‘lardik.
Hozir Dildora bilan maxsus reja asosida ish boshladik. Birinchi vazifa Navoiy g‘azallarini ifodali o‘qishni yanada mukammalashtirish, bu boradagi kamchiliklarni bartaraf etish, yod olingan 100 ta g‘azal miqdorini ko‘paytirish. Qolaversa, shoir sheʼriyati borasidagi izlanishlar olib borish, maqola va sharhlar tayyorlash. Qizimiz kelgusida Navoiy ijodining yaxshi bir targ‘ibotchisi bo‘ladi degan umiddaman”, — deydi Farida Karimova.
Qahramonimiz bilan 9-fevral, Mir Alisher Navoiy tavalludiga 582 yil to‘lgan kuni intervyu oldik. Bu biz uchun ancha mashaqqatli bo‘ldi, chunki Dildora nafaqat o‘zi o‘qiyotgan universitet, balki tug‘ilib-o‘sgan tumanidagi navoiyxonlik tadbirlariga ham taklif etilgan ekan. Buni ham yaxshilikka yo‘ydik va navoiyshunos olima bo‘lishni ko‘zlagan talaba yozajak asarlar shunday qo‘lma-qo‘l o‘qilishini tilab, xayrlashdik.
Izoh (0)