Oʻzbekistonda xizmat koʻrsatgan artist Saida Rametova “Oʻzim” loyihasiga bergan intervyusida nega Turkiyada saratonga qarshi davolanishni istamagani va ogʻir xastalikdan qolgan xotiralari haqida soʻzlab berdi.
— “Jaloliddin Manguberdi” serialining birinchi mavsumi suratga olinayotgan paytda uydagilar turmush oʻrtogʻimning salomatli yomonlashgani haqida xabar berdi. Bir mahal mening ham mazam qochdi. Chap tomonim ogʻrigani uchun shamol tegdi deb oʻylagandim. Bir kuni Tohir Saidov “Opa, qoʻlimni shamollatdim shekilli ogʻriyapti, shifokorga koʻrinib kelaman”, dedi. Oʻsha kuni mening ham syomkam yoʻq edi, unga ergashdim.
Tohir shifokor koʻrigidan tez chiqdi. Haqiqatan ham qoʻlini shamollatgan ekan, bittagina maz yozib berishibdi. Meni esa u shifokor, bunisini, keyin yana boshqasiga joʻnataverdi. Oxiri “Nima gap, nega meni buncha tekshirishyapti”, deb yuragimga gʻulgʻula tushdi. Tohir ham hech narsani gapirolmay, jim boʻlib qoldi. Turk professori “Saidaxonimga haqiqatni aytish kerak”, dedi. Turk tilini biroz boʻlsa-da bilganim uchun uning gaplarini tushunishim qiyin kechmadi. “Senda ikkinchi bosqichdagi koʻkrak saratoni aniqlandi. Shuning uchun chap tomoning ogʻriq bergan. Endi sen barcha syomkalarni toʻxtatib, seni operatsiya qilib davolaymiz”, dedi. U professor koʻrigiga kirish uchun bemorlar toʻrt oylab navbatda turishganini koʻrganim uchun darrov rozi boʻldim.
Oʻzbekistondan borganimiz va tashkilotchilarning yordami bilan u shifokor koʻrigiga kirishim oson kechdi. Bundan tashqari serial prodyuseri Mexmet Boʻzdagʻ “Hamma sharoitlarni yaratib beramiz, sogʻaysang boʻldi”, dedi. Oʻshanda ham rolni tashlab ketishga koʻzim qiymay “Suratga olish ishlari tugasin, keyin boraman”, desam shifokor tanbeh berdi. “Saraton tez rivojlanadi, senga quyosh mumkin emas. Sogʻ boʻlsang hammasi boʻlaveradi”, deb tushuntirdi, — deydi aktrisa Saida Rametova.
Saida Rametova nega Turkiyada davolanishni istamay, Oʻzbekistonga qaytganini quyidagicha izohladi.
— Mehmonxonaga kelib, 15-20 daqiqalar koʻzim ilinibdi. Qulogʻimga kimdir “Ket-ket” degandek boʻldi. Choʻchib uygʻonib ketdim va Turkiyada aktyorlarga gʻamxoʻrlik qilgan tashkilotchi Farhod Badalovga ketishga qaror qilganim haqida aytdim. “Opa, davolanish uchun odamlar Turkiyaga keladi-ku, hammamiz yoningizda boʻlamiz”, dedi. Rayhon Ulasenova, Raʼno Shodiyeva, Feruza Normatova va Yulduz Rajabovalar bir kundan yonimda turishga kelishib olishgan ekan. Hammaga rahmat aytib, koʻnglim bu yerdan ket deyotganini aytdim. “Reys yoʻq opa”, deb u vaziyatni tushuntirishga urindi. “Mabodo oʻlib qolsam oʻligim shu yerda qolib ketadimi? Samolyot uchmayotgan boʻlsa bolalarim ham bu yerga kelisholmaydimi?” deb hayolimdan oʻtkazdim. Nolalarimni Yaratgan eshitdimi bilmadim, ikki kundan keyin Oʻzbekistonga charter-reyslarning qatnovi boshlandi. Yodgor Sa'diyevning maslahati bilan Toshkent onkologiya kasalxonasiga borib, davolanishlarni boshladim, — deydi aktrisa Saida Rametova.
Aktrisa kasallikka taslim boʻlmagani, davolanayotgan paytida ham xalq xizmatidan qolmaganining sabablari haqida ham aytib oʻtdi.
— “Voy men kasal ekanman”, deb yotib olmadim. Faqat harakatda boʻldim, teatrga ham, toʻyga ham boraverdim. Tushkunlikka tushmay sogʻayib ketishimga ishondim. Pozitiv kayfiyatda boʻlishga va ruhimni tushurmaslikka harakat qildim. Kimyo terapiya olgandan keyin ikki-uch kun oʻtib, tadbirlarga ham boraverardim. Davolovchi shifokorlarim ham hayron boʻlib “Bunaqa bemorni koʻrmaganmiz”, deyishardi. Ana shunday qiyin vaziyatda qoʻllab-quvvatlagan muxlislarimga minnatdorlik bildiraman. “Bu kasal-ku” deb chetga surib qoʻyishgani yoʻq. Qaysi davraga kirib bormay, duo qilib, moddiy koʻmak ham berishdi, — deydi aktrisa Saida Rametova.
Aktrisa turmush oʻrtogʻi Oʻzbekistonda xizmat koʻrsatgan artist Jumadulla Rametovda Alsgeymer kasalligining aniqlanishi va bugungi ahvoli haqida ham gapirdi.
— Koronavirusga chalingandan keyin xotirasi yomonlashganini sezdik. Teatrda va serial syomkalariga borganda ssenariylarni yodlolmay qiynalardi. Alsgeymer kasalligining asoratlari va injiqliklari juda koʻp ekan. Bir yil ichida olib bormagan shifokor-u, tabiblarimiz qolmadi. Hozir ham kasalxonada, shifokorlar juda yaxshi qarashyapti. Odamlar juda sogʻingan. Yaqinda uni videoga olib, tarmoqqa joyladik. Muxlislari, qarindosh-urugʻlar juda yaxshi tilaklarni bildirishdi. Jumadulla aka esa hammani duo qildi, — deydi aktrisa Saida Rametova.
Izoh (0)