Ўзбекистонда хизмат кўрсатган артист Саида Раметова “Ўзим” лойиҳасига берган интервьюсида нега Туркияда саратонга қарши даволанишни истамагани ва оғир хасталикдан қолган хотиралари ҳақида сўзлаб берди.
— “Жалолиддин Мангуберди” сериалининг биринчи мавсуми суратга олинаётган пайтда уйдагилар турмуш ўртоғимнинг саломатли ёмонлашгани ҳақида хабар берди. Бир маҳал менинг ҳам мазам қочди. Чап томоним оғригани учун шамол тегди деб ўйлагандим. Бир куни Тоҳир Саидов “Опа, қўлимни шамоллатдим шекилли оғрияпти, шифокорга кўриниб келаман”, деди. Ўша куни менинг ҳам сёмкам йўқ эди, унга эргашдим.
Тоҳир шифокор кўригидан тез чиқди. Ҳақиқатан ҳам қўлини шамоллатган экан, биттагина маз ёзиб беришибди. Мени эса у шифокор, бунисини, кейин яна бошқасига жўнатаверди. Охири “Нима гап, нега мени бунча текширишяпти”, деб юрагимга ғулғула тушди. Тоҳир ҳам ҳеч нарсани гапиролмай, жим бўлиб қолди. Турк профессори “Саидахонимга ҳақиқатни айтиш керак”, деди. Турк тилини бироз бўлса-да билганим учун унинг гапларини тушунишим қийин кечмади. “Сенда иккинчи босқичдаги кўкрак саратони аниқланди. Шунинг учун чап томонинг оғриқ берган. Энди сен барча сёмкаларни тўхтатиб, сени операция қилиб даволаймиз”, деди. У профессор кўригига кириш учун беморлар тўрт ойлаб навбатда туришганини кўрганим учун дарров рози бўлдим.
Ўзбекистондан борганимиз ва ташкилотчиларнинг ёрдами билан у шифокор кўригига киришим осон кечди. Бундан ташқари сериал продюсери Мехмет Бўздағ “Ҳамма шароитларни яратиб берамиз, соғайсанг бўлди”, деди. Ўшанда ҳам ролни ташлаб кетишга кўзим қиймай “Суратга олиш ишлари тугасин, кейин бораман”, десам шифокор танбеҳ берди. “Саратон тез ривожланади, сенга қуёш мумкин эмас. Соғ бўлсанг ҳаммаси бўлаверади”, деб тушунтирди, — дейди актриса Саида Раметова.
Саида Раметова нега Туркияда даволанишни истамай, Ўзбекистонга қайтганини қуйидагича изоҳлади.
— Меҳмонхонага келиб, 15-20 дақиқалар кўзим илинибди. Қулоғимга кимдир “Кет-кет” дегандек бўлди. Чўчиб уйғониб кетдим ва Туркияда актёрларга ғамхўрлик қилган ташкилотчи Фарҳод Бадаловга кетишга қарор қилганим ҳақида айтдим. “Опа, даволаниш учун одамлар Туркияга келади-ку, ҳаммамиз ёнингизда бўламиз”, деди. Райҳон Уласенова, Раъно Шодиева, Феруза Норматова ва Юлдуз Ражабовалар бир кундан ёнимда туришга келишиб олишган экан. Ҳаммага раҳмат айтиб, кўнглим бу ердан кет деётганини айтдим. “Рейс йўқ опа”, деб у вазиятни тушунтиришга уринди. “Мабодо ўлиб қолсам ўлигим шу ерда қолиб кетадими? Самолёт учмаётган бўлса болаларим ҳам бу ерга келишолмайдими?” деб ҳаёлимдан ўтказдим. Нолаларимни Яратган эшитдими билмадим, икки кундан кейин Ўзбекистонга чартер-рейсларнинг қатнови бошланди. Ёдгор Саъдиевнинг маслаҳати билан Тошкент онкология касалхонасига бориб, даволанишларни бошладим, — дейди актриса Саида Раметова.
Актриса касалликка таслим бўлмагани, даволанаётган пайтида ҳам халқ хизматидан қолмаганининг сабаблари ҳақида ҳам айтиб ўтди.
— “Вой мен касал эканман”, деб ётиб олмадим. Фақат ҳаракатда бўлдим, театрга ҳам, тўйга ҳам боравердим. Тушкунликка тушмай соғайиб кетишимга ишондим. Позитив кайфиятда бўлишга ва руҳимни тушурмасликка ҳаракат қилдим. Кимё терапия олгандан кейин икки-уч кун ўтиб, тадбирларга ҳам бораверардим. Даволовчи шифокорларим ҳам ҳайрон бўлиб “Бунақа беморни кўрмаганмиз”, дейишарди. Ана шундай қийин вазиятда қўллаб-қувватлаган мухлисларимга миннатдорлик билдираман. “Бу касал-ку” деб четга суриб қўйишгани йўқ. Қайси даврага кириб бормай, дуо қилиб, моддий кўмак ҳам беришди, — дейди актриса Саида Раметова.
Актриса турмуш ўртоғи Ўзбекистонда хизмат кўрсатган артист Жумадулла Раметовда алсгеймер касаллигининг аниқланиши ва бугунги аҳволи ҳақида ҳам гапирди.
— Коронавирусга чалингандан кейин хотираси ёмонлашганини сездик. Театрда ва сериал сёмкаларига борганда сценарийларни ёдлолмай қийналарди. Алцгеймер касаллигининг асоратлари ва инжиқликлари жуда кўп экан. Бир йил ичида олиб бормаган шифокор-у, табибларимиз қолмади. Ҳозир ҳам касалхонада, шифокорлар жуда яхши қарашаяпти. Одамлар жуда соғинган. Яқинда уни видеога олиб, тармоққа жойладик. Мухлислари, қариндош-уруғлар жуда яхши тилакларни билдиришди. Жумадулла ака эса ҳаммани дуо қилди, — дейди актриса Саида Раметова.
Изоҳ (0)