Aktyor bo‘lish bu — turli xil personajlarga aylana olishdir. Ammo ba’zida ma’lum bir qahramonni muvaffaqiyatli ijro etgan aktyor rejissorlar tomonidan shu kabi rollarga taklif qilinaveradi. Shu sababli ba’zi kino yulduzlar o‘z rolining garoviga aylanadi. Ayrimlar esa bu qolipdan chiqib, kutilmagan rollari bilan tomoshabinlarni hayratlantirishda davom etadi.
Lili Jeyms
Lili Jeymsning birinchi ishlaridan biri “Daunton abbatligi” filmidagi Rouz roli bo‘lgan va romantik qizni o‘ynash takliflari aktrisani shoshirib qo‘ydi.
“Urush va tinchlik” mini-seriali, “Kitob o‘qish va kartoshkali pirogni sevuvchilar klubi”, “G‘urur va andisha va zombi”, “Rebeka” filmlari, shuningdek, “Zolushka” — aktrisaning filmografiyasida bu filmlar muhim o‘rin tutadi, lekin ular tomoshabinga uning iste’dodining faqat bir tomonini — yoqimtoy uyatchan qizni tasvirlash qobiliyatini namoyish etadi.
2022-yilda Lili odatdagi rolidan uzoqlashishga va o‘zi uchun mutlaqo yangi obrazni yaratishga qaror qildi. U bir necha o‘n yillar oldin butun dunyoga mashhur bo‘lgan Pamela Anderson rolini o‘ynadi. “Pem va Tommi” seriali Jeymsning mahoratini yana bir bor namoyish etdi. O‘z ishi uchun u birinchi marta eng yaxshi aktrisa sifatida bir qator ajoyib mukofotlarga nomzod bo‘ldi.
Jeyson Momoa
Jeyson Momoa “Varvar Konan” filmida rol o‘ynaganidan so‘ng, ko‘pincha ajoyib kuchga ega jangchi roliga taklif tusha boshladi. “Taxtlar o‘yini” va “Ko‘rish” seriallarida tashqi ko‘rinishi va xarakteri bilan bir xil bahaybat vahshiyga o‘xshash qahramonlarni ijro etdi. “Dyuna” va “Akvamen” filmlarida aktyor g‘ayrioddiy liboslarda yuradigan, ammo shunga qaramay, har qanday vaqtda dushmanlarga qarshi kurashishga tayyor shafqatsiz odamni o‘ynagan.
Ammo 2022-yilda Momoa “Orzular o‘lkasi” ertak filmida bosh rolni ijro etib, barchani lol qoldirishga muvaffaq bo‘ldi. U kichkina qizga sehrli marvaridni topishga yordam beradigan shoxlari va o‘tkir tishli qahramon rolini o‘ynadi. Bu roli bilan u oilaviy, samimiy filmlarni uddalay olishini isbotladi.
Genri Golding
Genri Goldingga uzoq vaqtdan beri romantik qahramon rolini o‘ynagan. Mashhur “O‘ta boy osiyoliklar”, “Oddiy ne’mat”, “Ikki kishilik Rojdestvo” filmlarida u yoqimtoy yigitlarni o‘ynagan. Ehtimol, Gay Richi bo‘lmaganida, bunday monoton rollarning oxiri bo‘lmasdi.
Ushbu rejissor tufayli Genri jangovar filmlarda yovuz qahramonlar roliga ham mos kelishini isbotlay oldi. “Jentlmenlar” filmida u Quruqko‘z laqabli gangster rolini o‘ynab, ayniqsa bosh qahramonlarning asablarini buzdi. Ehtimol, bu roldan keyin rejissorlar Golding iste’dodining yangi qirralarini ko‘rishgan. Ma'lumki, u yaqinda 2023-yilda chiqishi rejalashtirilgan josuslik trillerida ham suratga tushgan.
Uill Smit
Ko‘pchilik tomoshabinlarda Uill Smit hamma joyda bir xil – quvnoq hazilkashdek taassurot uyg‘otadi. Bu mashhur “Qora libosli odamlar” yoki nisbatan yangi ertak “Olouddin” bo‘ladimi – har xil liboslar va manzaralarda bo‘lsa-da, deyarli bir xil personajlarni ko‘ramiz. Tarmoq foydalanuvchilari Uill shunchaki blokbasterlarni tanlab, tajriba o‘tkazishni xohlamasligini aytishadi.
Ammo 2022-yilda aktyor o‘zining odatiy qiyofasidan uzoqlashishga qaror qildi va “Ozodlik” filmida murakkab dramatik rol o‘ynadi, bu ko‘plab tomoshabinlarni unga boshqa tomondan qarashga majbur qildi. U o‘tgan asrning shafqatsiz davrida juda aziyat chekkan, va nihoyat qochib ketgan qul obrazini yaratdi.
Peddi Konsidayn
So‘nggi paytlarda Peddi asosan jangovar va kriminal filmlarda ikkinchi darajali rollarda o‘ynadi. Uning ishtirokidagi ko‘plab kartinalar xalqaro xitga aylangan bo‘lsa-da, bu aktyorning nomini tomoshabinlar eslab qolishmaydi. Va hatto bugungi kunda “Nokdoun”, “Born ultimatum” filmlarining muxlislari ham Konsidayn ularda kimni o‘ynaganligi haqidagi savolga javob bermasligi mumkin. “Shelbilar oilasi” va “Kelgindi” haqida ham shunday deyish mumkin.
Ammo aktyor boshqa janrni — epik fantaziyani tanlashi bilanoq, u olamshumuk mashhurlika erishdi. 2022-yilda afsonaviy “Ajdaho uyi” loyihasida u qirol Vizeris rolini o‘ynagan va monarx hayotining turli bosqichlarini tasvirlagan. Uning obrazi tomoshabinlarda juda ko‘p his-tuyg‘ularni uyg‘otdi: g‘azab va qoralashdan achinishgacha.
Sem Klaflin
“Hayot-mamot o‘yinlari” franshizasining qismlaridan biridagi omadli rolidan so‘ng, Klaflin melodramada juda yaxshi muvaffaqiyatga erishdi. Lekin, aytish kerak, u bir muddat ishqiy qahramon obrazida qolib ketdi. “Muhabbat bilan, Rozi”, “Amakivachcham Reychel”, “Seni uchratguncha” filmlarida sujet juftlik atrofiga qurilgan, bu filmlardagi qalbi yaralangan yigit rolini aktyor Klaflin ijro etgandi.
Ammo 2023-yilda tomoshabinlar Semni noodatiy ko‘rinishda ko‘rish imkoniyatiga ega bo‘ladilar. Aktyor biz premyerasini intiqlik bilan kutayotgan “Daisy Jones and The Six” serialida 70-yillarning rok yulduzini o‘ynagan.
Leyton Mister
Bir yil oldin internet-jurnallar nima uchun Leyton Mister ekranlarda deyarli ko‘rinmay qolgani bilan qiziqa boshladi. Buning sabablaridan biri aktrisaning kelajakdagi ijodiga soya solgan “G‘iybatchi qiz” serialidagi bosh roli bo‘lgan. Darhaqiqat, ko‘plab filmlarda muxlislar o‘sha zamonviy Blerni ko‘rishda davom etishdi. Masalan, “Monte Karlo” va “Xonadosh” kartinalarida ham. Aktrisaning obrazlari boshqacha xarakterga ega bo‘lsa ham, ularda umumiylik bor edi.
Ammo 2022-yilda Leyton ishtirokidagi yangi film chiqdi va u butunlay boshqacha rolda paydo bo‘ldi. U turmush qurgan ayol rolini o‘ynadi, uning nikohi buzilish arafasida, bundan tashqari, uning eng yaqin dugonasi bazmdan keyin yo‘qolib qoladi.
Izoh (0)