Badminton bo‘yicha Hindiston chempioni, Ayshvariya Ray bilan solishtiriladigan Bollivud yulduzi Dipika Padukonening hayot va ijod yo‘li haqida (foto) 

Dipika Padukone badminton sport turi bo‘yicha dunyo bo‘ylab mashhurlikka erishishi mumkin edi. Biroq u 16 yoshida model bo‘lish istagida to‘satdan sportni tark etdi. Bugungi kunda Dipika Bollivudning eng muvaffaqiyatli va izlanuvchan aktrisalaridan biri hisoblanadi. U hind kino olamida o‘z o‘rnini egallashdan oldin ko‘plab qiyinchiliklarni yengib o‘tdi.  

Dipika Padukone 1986-yilning 5-yanvarida Daniya poytaxti Kopengagenda tug‘ilgan, uning otasi badminton yulduzi Prakash Padukone 1991-yilgacha ushbu sport turi bilan shug‘ullangan. Dip oilasining barcha a’zolari sport bilan shug‘ullanar edi.  

Aktrisaning bobosi “Maysur badminton assotsiatsiyasi”da ishlagan. Dipikaning otasi ham butun yoshligini ushbu sport turiga bag‘ishladi va badminton bo‘yicha dunyodagi eng yaxshi o‘yinchiga aylandi.

Prakash 19 yoshida u birinchi xalqaro unvonni qo‘lga kiritdi. U 1980-yilda dunyoda birinchi o‘rinni egalladi va 36 yoshida 3 ta xalqaro oltin medal bilan nafaqaga chiqdi. Keyinchalik u o‘zi tug‘ilib o‘sgan Bangalor shahrida yosh o‘yinchilarni tayyorlash akademiyasini tashkil etdi va uch yil davomida Hindiston terma jamoasiga ustozlik qildi.

Dipika bolaligida badminton bo‘yicha Hindiston chempioni bo‘lgan va basketbolni professional darajada o‘ynagan. Uning singlisi Anisha ham xalqaro golf chempioni, shuningdek, kriket va basketbol bo‘yicha professional bo‘lgan. 

Dipikaning 6 yoshgacha bo‘lgan davri Bangalor va Daniyaga sayohat qilish bilan o‘tdi. 1991-yilda aktrisaning oilasi Hindistonga qaytib keldi va keyin Dip uchun sportchining haqiqiy hayoti boshlandi. U ertalab soat 5 da turib, mashq qilib, maktabga borardi. Keyin yana mashg‘ulotlar bilan shug‘ullanib, uy vazifasini tayyorlab, uxlar edi.

Dipika intervyularining birida bolaligida uyatchan qiz bo‘lganini aytgan, ammo uning jadvaliga qarab, u uyatchanmi yoki yo‘qligini bilib bo‘lmaydi. U mashg‘ulotlar va o‘qishdan tashqari, hech narsa bilan shug‘ullanmagan.

16 yoshida chempion bo‘lgan Dipika jasoratini to‘plab, otasiga badmintonni tashlamoqchi ekanini aytgan. Dipika esa otasi uning bu qaroridan umuman ranjimaganini ko‘rib hayron qoladi. Dipika kollejga qabul qilindi, biroq o‘qimadi, chunki unga model sifatida ishlashni taklif qilishdi.

Aktrisa 21 yoshida kinolarda suratga tushish uchun xolasi bilan Bombeyga ko‘chib o‘tdi. Dipika mehnatsevar edi va u o‘z karyerasiga jiddiy e’tibor qaratdi. O‘zini soatlab mashg‘ulotlarga bag‘ishlagan aktrisa hayotga yengil qaray olmadi.

U nafaqat tashqi ko‘rinishi, balki mehnatsevarligi tufayli ham tezda mashhurlikka erishdi. Dipika kino sanoatda birinchi marta paydo bo‘lganida, uni mamlakatdagi eng mashhur model Ayshvariya Ray bilan solishtirishdi. Dipika bosma reklamalar, teleko‘rsatuvlar va musiqiy videolarda rol o‘ynadi.

Dipika shartnoma imzolangan birinchi film “Yangi yilingiz bilan” kinokartinasi edi. Aslida, rejissor Farah Xon Malayka Aroraga bu rolni bermoqchi edi, lekin Malayka bu loyihaga qiziqmadi va uning o‘rniga Dipikaning agenti bo‘lgan do‘stining raqamini berdi. Ushbu loyiha suratga olinmadi va Dipika uning o‘rniga “Ayshvariya” deb nomlangan filmda debyut qildi.

Biroq, Farah Dipga “Om Shanti Om” melodramasidan bosh rolni taklif qildi. Shundan keyin Dipika kino yulduziga aylandi. U yaxshi aktrisa edi, ammo uning birinchi rollari aktrisaning iste’dodini umuman ochib bermadi.

Padukone loyihalarda shunchaki qahramon sevib qolgan go‘zal qiz rolini o‘ynashi kerak edi. Uning salohiyatini tushunishga yordam beradigan narsa yo‘q edi.

Bular esa uning o‘ziga xos jihatlarini ochib bermagan yoki aktrisani boshqalardan ajratib turmagan. Dipika aktrisa sifatida o‘zini ko‘rsatishi kerak edi. U “Kokteyl” filmida suratga tushganidan keyin o‘zi uchun kerakli narsani topdi.

Ushbu filmda u haqiqatan ham nimaga qodirligini ko‘rsatdi. Bu ajoyib ijro va murakkab xarakter edi. Aktrisaning obrazi nazariy jihatdan tomoshabinga yoqmasligi kerak bo‘lgan katta yurakli qiz edi, biroq Dipika o‘zining betakror tabassumi bilan bu ishning uddasidan chiqdi.

Dipika ikkinchi hind filmi ustida ishlayotgan paytda partnyori Ranbir Kapurni sevib qolgan. O‘sha paytda aktyor 26 yoshda, Dipika esa 21 yoshda edi. Ular ko‘p marta birga intervyu berishdi, Dipika uning ota-onasi bilan suratga tushdi va boshining orqa tomoniga “RK” harflarini tatuirovka qildi. Aktrisa keyinchalik Ranbir uni aldab yurganini bildi va shundan keyin juftlik ajrashdi.

Bunday vaziyatda ko‘plab ayollar to‘xtab qolib, uyga qaytib, ommaning ko‘zidan yashirinishardi. Ammo Dipika og‘riqni ichiga yutdi va jilmayib qo‘ydi. U 5 yillik kurashdan so‘ng  aktrisa sifatida porlashiga imkon beradigan rolga ega bo‘ldi.

O‘sha yili Dipika uni so‘zsiz qo‘llab-quvvatlagan va sevadigan insonni topdi — bu Ranvir Singx. Dipika turmush qurish o‘rniga yangi qiyinchiliklarni izlashda va g‘alaba qozonishda davom etdi. U Hindistonning ikki buyuk aktyori Irfan Xon va Amitabh Bachchan ishtirok etgan “Piku” filmida rol o‘ynadi.

Keyinroq aktrisaning depressiya bilan kurashayotgani ommaga oshkor bo‘ldi va u maktab o‘quvchilari, shifokorlar, ijtimoiy tarmoqlarda depressiya haqida ma’lumot beruvchi nodavlat tashkilotga asos soldi.

Dipika Gollivudda “Uch iks: Dunyo hukmronligi” jangovar filmida o‘ynadi va G‘arbdagi karyerasi yuksalmagandan keyin Hindistonga qaytdi.

U “Padmavati” nomli hind dostonidagi qiyin va yuqori darajadagi rolni o‘z zimmasiga oldi va yana bir bor eng yuqori pog‘onaga chiqdi. Ushbu dramaning ulkan muvaffaqiyatidan so‘ng, Dipika va Ranvir 6 yillik munosabatlarini mustahkamlab, 2018-yilning noyabrida rasman nikohdan o‘tdi.

Dipika Padukone 2020-yilda “Muhr” filmining chiqishi bilan prodyuserga aylandi, u filmda kislota hujumi qurboni  bo‘lgan qiz rolini ijro etdi. Aktrisa 2022-yilda muxlislariga “Chuqurlik" dramasini taqdim etdi va tez orada “Pathan” kinokartinasida partnyori Shohruh Xon bilan ekranga chiqadi. Bundan tashqari aktrisa Prabhas va Ritik Roshan bilan yirik loyihalarda ham suratga tushadi.