Shavkat Mirziyoyevning Namanganga tashrifi davomida bo‘lib o‘tgan uchrashuvda namanganlik tadbirkor Dilshod Otamirzayev davlat rahbaridan mehnati uchun berilajak orden haqida xushxabar va alohida topshiriq oldi. Bu haqda u “Daryo” muxbiri Azizbek Abduvaliyevga batafsil hikoya qildi.
“Turmush o‘rtog‘im ketishga undamaganida hozir ham xorijda yurgan bo‘lardim”
37 yoshdaman. 2019-yilgacha, 15 yilga yaqin Rossiyada, musofirchilikda yurdim. Hamma ishni qilib ko‘rdim, oxirgi besh yil davomida Moskvada baliqchilik bilan shug‘ullandim. Xorijga oilamni ham olib ketgandim. Turmush o‘rtog‘im “O‘zbekistonda tadbirkorlarga yaxshi sharoitlar yaratib berilayotgan ekan, bo‘ldi endi, uyga qaytaylik”, deb qistalang qilaverdi. O‘zim ham prezidentning chiqishlarini kuzatib yurgandim. “Bo‘pti, ketamiz” dedim va 2019-yili O‘zbekistonga qaytib keldik.
2020-yili Uchqo‘rg‘onda, qarindoshimizning qarovsiz yerida 120 metrli hovuz qazdirib, forel baliqlari yetishtirishni yo‘lga qo‘ydim. Birinchi yilning o‘zida 35 tonna baliq oldim. Tuman, viloyat hokimlari kelib, ishimni kuzatishdi, qo‘llab-quvvatlashdi. Viloyat hokimi Shavkat Abdurazzaqov “endi faoliyatingni kengaytir, odamlarni baliq yetishtirishga o‘rgat, biz qanday yordam bo‘lsa tayyormiz” deb aytdi. Hozir 700 ta hovuzim bor, 300 nafardan ortiq odam ish bilan taʼminlangan.
.jpg)
Boshida shunga daʼvat qilganimda ko‘pchilik bunga ishonmagandi. Qo‘ni-qo‘shnilar, oshna-og‘aynilarni ko‘ndirishga to‘g‘ri keldi. Natija chakki bo‘lmadi: 4 oyda hovuzlarimda baliq boqib, 15 million so‘mgacha daromad olishdi. Tarozining tepasida turib, pullarini sanab berdim. Ko‘pgina shogirdlar chiqardim, hozir ishchilarimning ayrimlari o‘zi ham tadbirkor. Aslida buning murakkab joyi yo‘q — yem, chavoqlarni o‘zimiz beramiz, faqat baliqlarni qunt bilan parvarishlashsa bo‘lgani. 300-400 grammli chavoqlar tez orada 1,5-2 kiloli rostmana forelga aylanadi.
Bu baliqning foydali xususiyatlari ko‘p, bekorga uni “xonbaliq” deyishmaydi. Kaloriyasi qo‘y go‘shtinikidek, qiltanog‘i kam, yosh boladan qariyagacha bemalol tanovul qilishi mumkin.
.jpg)
Davlat rahbariga shular haqida gapirib berdim. “Uchrashuvdagi gaplaringizdan ruhlandim, shu paytgacha ishlamay, dangasalik qilib yurgan ekanmiz, hovuzlar sonini ham, ishchilari sonini ham 2 mingtaga yetkazaman”, deb vaʼda berdim. U kishi “xalqqa foydasi tegadigan ishlarni amalga oshiribsan, buning uchun mening nomimdan kelinimga katta rahmat ayt” dedilar. Uyga kelgandan so‘ng bularning hammasini oqizmay-tomizmay turmush o‘rtog‘imga aytib berdim. Nuqul “qo‘ying, hazillashmang” deydi. Oxiri o‘zi telekanallar, ijtimoiy tarmoqlarda uchrashuv haqidagi lavhalarni ko‘rib, keyin ishonch hosil qildi.
Mahalla bilan baham ko‘riladigan mini GES, mehmon uylari va eksport
Hozir 5 gektar maydonda 2 millionga yaqin forel baliqlarim bor. Bu baliq xaridorgir hisoblanadi, kilosi katta-kichikligiga qarab 60 mingdan 100 ming so‘mgacha. Yana 500 mingta sazan balig‘ini ham yetishtiryapman. Qayta ishlash sexini quryapman, eksportni yo‘lga qo‘ymoqchiman. Mehmon uylarimiz bitib qoldi: xo‘jaligimizga kelgan odam, ayniqsa sayyohlar bemalol o‘zi qo‘liga qarmoq olib, baliq ovlab, shu yerning o‘zida tayyorlatishi mumkin.
Prezident muqobil energetika haqida gapirganlaridan so‘ng bunga ham qiziqib qoldim. Internetni titkilab, o‘zimizdan, Qashqadaryodan mutaxassislarni topdim. 425 metr uzoqlikdan quvur tortib, mini GES qilyapmiz, 80 foizga ishi bitib qoldi. To‘la quvvat bilan ishga tushganidan so‘ng 380 kilovatt elektr energiyasi hosil qilar ekan. Menga buning uchdan bir qismi yetadi, qolganini mahalla bilan baham ko‘ramiz.
“Yosh boladek o‘zimni yig‘idan to‘xtatolmadim”
Prezident Namangandagi uchrashuvda “Shuncha odamni ish bilan taʼminlagani, dunyoqarashini o‘zgartirgani, musofirchilikni ko‘rgani uchun shu yigitga orden bersam” dedilar. Shu paytgacha yig‘lagan bola emasdim. Ko‘zimdan tirqirab yosh chiqib ketdi, xuddi boladek o‘zimni yig‘idan to‘xtatolmayman. Bu gaplardan keyin tortgan mashaqqatlarim, qilgan mehnatlarim, hammasi chiqib ketdi. Aslida menga orden ham shart emas, davlat rahbarining ishonchi va daldasi yetib ortadi.
Uyga kelyapman, telefonim tinmaydi. O‘zbekistonning turli nuqtalari, Rossiyadan, hatto Germaniyadan ham qo‘ng‘iroq qilib tabriklashdi. To‘g‘risi, shuncha tanishim, shuncha do‘stim borligini o‘zim ham bilmas ekanman.
Bugun, 7-yanvar kuni Uchqo‘rg‘on tumanidagi madaniyat saroyida "Uchqo‘rg‘on forel baliq" MJCH rahbari Dilshod Otamirzayevni taqdirlash marosimi bo‘lib o‘tdi. Namangan viloyati hokimi Shavkat Abdurazzaqov davlat rahbari nomidan tadbirkorga “Mehnat shuhrati” ordenini topshirdi. Yana bir jihati, bugun Dilshodning otasi Zokirjon Otamirzayevning tavallud ayyomi ham ekan. Viloyat rahbarlari otani ham muborakbod etib, to‘n kiygizishdi. Aslida bugungi tadbir u kishi uchun eng katta sovg‘a bo‘lganiga shubha yo‘q.
Izoh (0)