“Менинг номимдан келинимга раҳмат айт”. Президентдан топшириқ олган наманганлик тадбиркор ҳикояси

Шавкат Мирзиёевнинг Наманганга ташрифи давомида бўлиб ўтган учрашувда наманганлик тадбиркор Дилшод Отамирзаев давлат раҳбаридан меҳнати учун берилажак орден ҳақида хушхабар ва алоҳида топшириқ олди. Бу ҳақда у “Дарё” мухбири Азизбек Абдувалиевга батафсил ҳикоя қилди.

“Турмуш ўртоғим кетишга ундамаганида ҳозир ҳам хорижда юрган бўлардим”

37 ёшдаман. 2019 йилгача, 15 йилга яқин Россияда, мусофирчиликда юрдим. Ҳамма ишни қилиб кўрдим, охирги беш йил давомида Москвада балиқчилик билан шуғулландим. Хорижга оиламни ҳам олиб кетгандим. Турмуш ўртоғим “Ўзбекистонда тадбиркорларга яхши шароитлар яратиб берилаётган экан, бўлди энди, уйга қайтайлик”, деб қисталанг қилаверди. Ўзим ҳам президент чиқишларини кузатиб юргандим. “Бўпти, кетамиз” дедим ва 2019 йили Ўзбекистонга қайтиб келдик.

2020 йили Учқўрғонда, қариндошимизнинг қаровсиз ерида 120 метрли ҳовуз қаздириб, форел балиқлари етиштиришни йўлга қўйдим. Биринчи йилнинг ўзида 35 тонна балиқ олдим. Туман, вилоят ҳокимлари келиб, ишимни кузатишди, қўллаб-қувватлашди. Вилоят ҳокими Шавкат Абдураззақов “энди фаолиятингни кенгайтир, одамларни балиқ етиштиришга ўргат, биз қандай ёрдам бўлса тайёрмиз” деб айтди. Ҳозир 700 та ҳовузим бор, 300 нафардан ортиқ одам иш билан таъминланган.

Бошида шунга даъват қилганимда кўпчилик бунга ишонмаганди. Қўни-қўшнилар, ошна-оғайниларни кўндиришга тўғри келди. Натижа чакки бўлмади: 4 ойда ҳовузларимда балиқ боқиб, 15 миллион сўмгача даромад олишди. Тарозининг тепасида туриб, пулларини санаб бердим. Кўпгина шогирдлар чиқардим, ҳозир ишчиларимнинг айримлари ўзи ҳам тадбиркор. Аслида бунинг мураккаб жойи йўқ — ем, чавоқларни ўзимиз берамиз, фақат балиқларни қунт билан парваришлашса бўлгани. 300-400 граммли чавоқлар тез орада 1,5-2 килоли ростмана форелга айланади.

Бу балиқнинг фойдали хусусиятлари кўп, бекорга уни “хонбалиқ” дейишмайди. Калорияси қўй гўштиникидек, қилтаноғи кам, ёш боладан қариягача бемалол тановул қилиши мумкин. 

Давлат раҳбарига шулар ҳақида гапириб бердим. “Учрашувдаги гапларингиздан руҳландим, шу пайтгача ишламай, дангасалик қилиб юрган эканмиз, ҳовузлар сонини ҳам, ишчилари сонини ҳам 2 мингтага етказаман”, деб ваъда бердим. У киши “халққа фойдаси тегадиган ишларни амалга оширибсан, бунинг учун менинг номимдан келинимга катта раҳмат айт” дедилар. Уйга келгандан сўнг буларнинг ҳаммасини оқизмай-томизмай турмуш ўртоғимга айтиб бердим. Нуқул “қўйинг, ҳазиллашманг” дейди. Охири ўзи телеканаллар, ижтимоий тармоқларда учрашув ҳақидаги лавҳаларни кўриб, кейин ишонч ҳосил қилди.

Маҳалла билан баҳам кўриладиган мини ГЭС, меҳмон уйлари ва экспорт

Ҳозир 5 гектар майдонда 2 миллионга яқин форел балиқларим бор. Бу балиқ харидоргир ҳисобланади, килоси катта-кичиклигига қараб 60 мингдан 100 минг сўмгача. Яна 500 мингта сазан балиғини ҳам етиштиряпман. Қайта ишлаш цехини қуряпман, экспортни йўлга қўймоқчиман. Меҳмон уйларимиз битиб қолди: хўжалигимизга келган одам, айниқса сайёҳлар бемалол ўзи қўлига қармоқ олиб, балиқ овлаб, шу ернинг ўзида тайёрлатиши мумкин.

Президент муқобил энергетика ҳақида гапирганларидан сўнг бунга ҳам қизиқиб қолдим. Интернетни титкилаб, ўзимиздан, Қашқадарёдан мутахассисларни топдим. 425 метр узоқликдан қувур тортиб, мини ГЭС қиляпмиз, 80 фоизга иши битиб қолди. Тўла қувват билан ишга тушганидан сўнг 380 киловатт электр энергияси ҳосил қилар экан. Менга бунинг учдан бир қисми етади, қолганини маҳалла билан баҳам кўрамиз.

“Ёш боладек ўзимни йиғидан тўхтатолмадим”

Президент Намангандаги учрашувда “Шунча одамни иш билан таъминлагани, дунёқарашини ўзгартиргани, мусофирчиликни кўргани учун шу йигитга орден берсам” дедилар. Шу пайтгача йиғлаган бола эмасдим. Кўзимдан тирқираб ёш чиқиб кетди, худди боладек ўзимни йиғидан тўхтатолмайман. Бу гаплардан кейин тортган машаққатларим, қилган меҳнатларим, ҳаммаси чиқиб кетди. Аслида менга орден ҳам шарт эмас, давлат раҳбарининг ишончи ва далдаси етиб ортади.

Уйга келяпман, телефоним тинмайди. Ўзбекистоннинг турли нуқталари, Россиядан, ҳатто Германиядан ҳам қўнғироқ қилиб табриклашди. Тўғриси, шунча танишим, шунча дўстим борлигини ўзим ҳам билмас эканман. 

Бугун, 7 январь куни Учқўрғон туманидаги маданият саройида "Учқўрғон форел балиқ" МЖЧ раҳбари Дилшод Отамирзаевни тақдирлаш маросими бўлиб ўтди. Наманган вилояти ҳокими Шавкат Абдураззақов давлат раҳбари номидан тадбиркорга “Меҳнат шуҳрати” орденини топширди. Яна бир жиҳати, бугун Дилшоднинг отаси Зокиржон Отамирзаевнинг таваллуд айёми ҳам экан. Вилоят раҳбарлари отани ҳам муборакбод этиб, тўн кийгизишди. Аслида бугунги тадбир у киши учун энг катта совға бўлганига шубҳа йўқ.