APL "Manchester Siti"ni 2009—2018-yillar oralig‘ida 100 dan ortiq moliyaviy qoidalarni buzganlikda ayblamoqda

Angliya Premyer Ligasi “Manchester Siti” klubini 100 dan ortiq moliyaviy qoidalarni buzganlikda ayblamoqda.

Premyer Liganing rasmiy sayti ma’lum qilishicha, “shaharliklar” 2009/10-yilgi mavsumdan 2017/18-yilgi mavsumga qadar juda ko‘p qoidalarni buzgan. 

Tergov ishlari 4 yildan ortiq davom etdi. Jarayon 2018-yil dekabrda Der Spiegel gazetasida “Manchester Siti”dagi moliyaviy qoidabuzarlik haqida maqola chop etilganidan so‘ng boshlangan. 

2009/10-yilgi mavsumdan 2017/18-yilgi mavsumgacha bo‘lgan yillarda manchesterliklar moliyaviy ahvoli haqida aniq ma’lumot bermagan. Gap daromadlar (shu jumladan, homiylardan keladigan daromadlar) va operatsion xarajatlar haqida ketmoqda. 

Premyer Liga ma’lumotlariga ko‘ra, 2009/10-yilgi mavsumdan 2012/13-yilgi mavsumga qadar “Manchester Siti” murabbiyning maoshi haqidagi to‘liq ma’lumotlarni kiritmagan. Xuddi shunday qoidabuzarliklar 2010/11-yilgi mavsumdan 2015/16-yilgi mavsumgacha ayrim futbolchilarga nisbatan ham sodir etilgan. 

Qayd etilishicha, 2013/14, 2014/15 va 2017/18-yilgi mavsumlarda “shaharliklar” UEFA klublarini litsenziyalash va moliyaviy feyr-pley qoidalariga rioya qilmagan. 

2015/16-yildan 2017/18-yilgacha bo‘lgan mavsumlarda esa klub Premyer Liganing foyda va barqarorlik to‘g‘risidagi qoidalarini buzgan. 

Undan tashqari, 2018-yilning dekabr oyidan hozirga qadar garchi Premyer Liga qoidalari shuni talab qilsa-da, “Manchester Siti” o‘z tekshiruvlarida Premyer Liga bilan hamkorlik qilmagan va kerakli hujjatlarni taqdim etmagan. 

Ushbu ayblovlar bo‘yicha sud jarayoni maxfiy va yopiq tarzda o‘tkazilmoqda.