Ayni vaqtda prezident Shavkat Mirziyoyev Namangan shahrida biznes vakillari, tadbirkorlar bilan muloqot oʻtkazmoqda. Bu haqda “Daryo” muxbiri xabar berdi.
Prezident bu yil qish nihoyatda sovuq kelganini taʼkidlab, koʻplab tadbirkorlar bundan qiynalganini bilishini aytdi.
“Xususan, respublikada 3 mingta hududiy sanoat korxonasida 7 trillion soʻmlik mahsulot ishlab chiqarilmadi (ularda 350 ming aholi band). Jumladan, Namangandagi 367 ta sanoat korxonasi 500 milliard soʻmga yaqin mahsulotni ishlab chiqara olmadi. Birgina Namangan tumani sanoatining 26 foizini tashkil qiladigan “Toshbuloq tekstil” korxonasi quvvati 47 foizga pasaygan. Oqibatda, 29 mingta tadbirkorning soliq qarzdorligi yil boshiga nisbatan 2 trillion soʻmga oshgan. Hisob-kitobga koʻra, zarur choralar koʻrilmasa, birinchi chorakda yalpi mahsulot oʻsishi 1,5 foizgacha pasayishi mumkin (5 foizdan 3,5 foizgacha). Oldimizda dolzarb vazifa – “qattiq sovuq” oqibatlarini bartaraf etib, biznes faoliyatini tezroq izga tushirish”, — dedi davlat rahbari.
Prezident, shu bois, iqtisodiyotda yoʻqotishlar oʻrnini qoplash va biznesni qoʻllab-quvvatlash uchun alohida qarorni imzolaganini aytdi. Ta'kidlanishicha, “Qattiq sovuq”dan qiyinchilik koʻrgan tadbirkorlarga kredit, soliq, bojxona va boshqa toʻlovlar boʻyicha yengilliklar beriladi. Jumladan:
- 2 ming nafar kichik va oʻrta tadbirkorlarning yanvar-martda muddati keladigan 4,7 trillion soʻm kredit toʻlovlari 1-iyunga qadar uzaytiriladi;
Namanganda 73 ta tadbirkorning 130 milliard soʻmlik kredit toʻlovlari uzaytiriladi.
- 29 mingta tadbirkorning 2 trillion soʻm soliqdan qarzini 1-iyulga qadar foizsiz, qoʻshimcha garovsiz va “penya”siz boʻlib-boʻlib toʻlash imkoniyati yaratiladi;
Namanganda 395 ta tadbirkorning 17 milliard soʻm soliq toʻlovlari uzaytiriladi.
- quvvati pasaygan 545 ta sanoat korxonasiga ishlab chiqarishni tiklash va aylanma mablagʻ uchun 8 trillion soʻm kredit ajratiladi;
Namanganda 44 ta tadbirkorga 65 milliard soʻm kredit ajratiladi.
- nosoz uskunalarni taʼmirlashga kreditlar ajratiladi, ular boʻyicha 2,5 milliard soʻmgacha kafillik beriladi va kredit stavkasining 4,5 foizi qoplab beriladi;
- 27 mingta tadbirkor uchun davlat mulki ijara toʻlovi 1-aprelga qadar oʻzgarmaydi va uni boʻlib-boʻlib toʻlashga ruxsat beriladi (tadbirkorlarda 52 milliard soʻm qoladi);
Namanganda 183 ta shunday tadbirkor bor.
- davlat mulkini sotib olgan tadbirkorlar uchun toʻlovlar, foiz va “penya” 1-aprelga qadar toʻxtatib turiladi;
- ishlab chiqarish binolarining har bir yuqori qavati uchun tadbirkorlarga mol-mulk soligʻidan 10 foizdan chegirma beriladi.
Prezident masʼullarga qarordagi choralarni tadbirkorlarga qoʻllanilishini taʼminlash boʻyicha topshiriq berdi.
Izoh (0)