Shavkat Mirziyoyev 31-yanvar kuni “O‘zbekiston Respublikasi Qurolli kuchlarini qurollantirish va mudofaa sanoati sohasida davlat boshqaruvini takomillashtirish bo‘yicha chora-tadbirlar to‘g‘risida”gi farmonni imzoladi.
Hujjat bilan O‘zbekiston Qurolli kuchlarini qurollantirish bo‘yicha davlat komissiyasi tashkil etildi. U maxsus organlarni qurol-yarog‘, harbiy va maxsus texnika bilan ta’minlashning yaqin, o‘rta va uzoq istiqbollarini belgilaydi, bu borada tegishli dasturlarni ko‘rib chiqadi, tasdiqlaydi. Maxsus organlarni harbiy va ikki xil maqsadga mo‘ljallangan mahsulotlar bilan ta’minlashni moliyalashtirish masalalarini ko‘rib chiqib, uning manbalarini belgilaydi. Davlat mudofaa buyurtmasini ko‘rib chiqib, tasdiqlaydi.
Bundan tashqari, urush davri uchun mahalliy ishlab chiqarish korxonalariga safarbarlik topshirig‘ini biriktirish bo‘yicha takliflarni, maxsus organlarni qurollantirish va mudofaa sanoatini rivojlantirish bo‘yicha chora-tadbirlar bajarilishini ko‘rib chiqadi va boshqa qator vazifalarni amalga oshiradi.
Davlat komissiyasi raisi O‘zbekiston prezidenti Shavkat Mirziyoyev hisoblanadi.
Hujjatda belgilanishicha, Mudofaa sanoati davlat qo‘mitasi negizida (Mudofaa vazirligi huzurida) Mudofaa sanoati agentligi hamda Investisiyalar, sanoat va savdo vazirligi huzurida “O‘ztextreyd” davlat unitar korxonasi tuzildi.
“O‘ztextreyd” DUK xorijda ishlab chiqariladigan harbiy mahsulotlarni xarid qilish, eksport qilish bilan shug‘ullanadi.
Izoh (0)