Xorazm viloyatining Bog‘ot tumanida ijaraga berilgan ekin maydonida sun’iy ko‘l tashkil qilinishi oqibatida 1,8 milliard so‘m zarar yetkazildi. Bu haqda Bosh prokuratura matbuot xizmati xabar berdi.
Xorazm viloyati prokuraturasi tomonidan olib borilgan tekshirish davomida fermer xo‘jaligi rahbari I.B. tomonidan Bog‘ot tuman hokimi qaroriga asosan o‘zi rahbarlik qilib kelayotgan “M.R” fermer xo‘jaligiga 46 yil muddatga ijara huquqi asosida ajratilgan jami 29,8 gektar ekin yerining 7,3 gektar sug‘oriladigan qismida noqonuniy ravishda sun’iy ko‘l tashkil qilingani aniqlangan.
Buning oqibatida qishloq xo‘jaligi ishlab chiqarishi nobudgarchiligiga yo‘l qo‘yib, davlat va jamiyat manfaatlariga 1 milliard 822 million so‘m miqdorida zarar yetkazilgan.
Mazkur holat yuzasidan I.B.ga nisbatan Jinoyat kodeksining 197-moddasi (yer, yerosti boyliklaridan foydalanish shartlarini yoki ularni muhofaza qilish talablarini buzish) bilan jinoyat ishi qo‘zg‘atilib, tergov harakatlari olib borishga kirishilgan.
Izoh (0)