“2000 нафар кичик ва ўрта тадбиркорларнинг январь мартда муддати келадиган 4,7 трлн сўм кредит тўловлари 1 июнга қадар узайтирилади” — президент  

Айни вақтда президент Шавкат Мирзиёев Наманган шаҳрида бизнес вакиллари, тадбиркорлар билан мулоқот ўтказмоқда. Бу ҳақда “Дарё” мухбири хабар берди. 

Президент бу йил қиш ниҳоятда совуқ келганини таъкидлаб, кўплаб тадбиркорлар бундан қийналганини билишини айтди.

“Хусусан, республикада 3 мингта ҳудудий саноат корхонасида 7 триллион сўмлик маҳсулот ишлаб чиқарилмади (уларда 350 минг аҳоли банд). Жумладан, Намангандаги 367 та саноат корхонаси 500 миллиард сўмга яқин маҳсулотни ишлаб чиқара олмади. Биргина Наманган тумани саноатининг 26 фоизини ташкил қиладиган “Тошбулоқ текстиль” корхонаси қуввати 47 фоизга пасайган. Оқибатда, 29 мингта тадбиркорнинг солиқ қарздорлиги йил бошига нисбатан 2 триллион сўмга ошган. Ҳисоб-китобга кўра, зарур чоралар кўрилмаса, биринчи  чоракда ялпи маҳсулот ўсиши 1,5 фоизгача пасайиши мумкин (5 фоиздан 3,5 фоизгача). Олдимизда долзарб вазифа – “қаттиқ совуқ” оқибатларини бартараф этиб, бизнес фаолиятини тезроқ изга тушириш”, — деди давлат раҳбари.

Президент, шу боис, иқтисодиётда йўқотишлар ўрнини қоплаш ва бизнесни қўллаб-қувватлаш учун алоҳида қарорни имзолаганини айтди. Таъкидланишича, “Қаттиқ совуқ”дан қийинчилик кўрган тадбиркорларга кредит, солиқ, божхона ва бошқа тўловлар бўйича енгилликлар берилади. Жумладан:

• 2 минг нафар кичик ва ўрта тадбиркорларнинг январь мартда муддати келадиган 4,7 триллион сўм кредит тўловлари 1 июнга қадар узайтирилади;

Наманганда 73 та тадбиркорнинг 130 миллиард сўмлик кредит тўловлари узайтирилади.

• 29 мингта тадбиркорнинг 2 триллион сўм солиқдан қарзини 1 июлга қадар фоизсиз, қўшимча гаровсиз ва “пеня”сиз бўлиб-бўлиб тўлаш имконияти яратилади;

Наманганда 395 та тадбиркорнинг 17 миллиард сўм солиқ тўловлари узайтирилади.

• қуввати пасайган 545 та саноат корхонасига ишлаб чиқаришни тиклаш ва айланма маблағ учун 8 триллион сўм кредит ажратилади;

Наманганда 44 та тадбиркорга 65 миллиард сўм кредит ажратилади.

• носоз ускуналарни таъмирлашга кредитлар ажратилади, улар бўйича 2,5 миллиард сўмгача кафиллик берилади ва кредит ставкасининг 4,5 фоизи қоплаб берилади;
• 27 мингта тадбиркор учун давлат мулки ижара тўлови 1 апрелга қадар ўзгармайди ва уни бўлиб-бўлиб тўлашга рухсат берилади (тадбиркорларда 52 миллиард сўм қолади);

Наманганда 183 та шундай тадбиркор бор.

• давлат мулкини сотиб олган тадбиркорлар учун тўловлар, фоиз ва “пеня” 1 апрелга қадар тўхтатиб турилади;
• ишлаб чиқариш биноларининг ҳар бир юқори қавати учун тадбиркорларга мол-мулк солиғидан 10 фоиздан чегирма берилади.

Президент масъулларга қарордаги чораларни тадбиркорларга қўлланилишини таъминлаш бўйича топшириқ берди.