Ayni vaqtda prezident Shavkat Mirziyoyev Fargʻona viloyatining Qoʻshtepa tumanida respublika paxta-toʻqimachilik klasterlari rahbarlari bilan muloqot qilmoqda. Bu haqda “Daryo” muxbiri xabar berdi.
Davlat rahbari 2023-yilda 100 ming gektar paxta va gʻalladan boʻshagan yerlar aholiga berilayotganini aytdi.
“Bunda, Andijonda – 2 ming gektar, Namanganda – 2,7 ming va Fargʻonada – 2,2 ming gektar paxta maydoni qisqaradi. Bu – 24 ming tonna paxta xom ashyosi, degani. Ushbu yoʻqotishni qoplash uchun, hosildorlikni 1,5-2 sentnerga oshirish kerak. Ushbu marralarni olish uchun, sizlarga barcha sharoitlar yaratiladi, yangi imkoniyatlar va qoʻshimcha resurslar beriladi. Shu bois, oʻtgan haftada klasterlarni yanada qoʻllab-quvvatlash va manfaatlarini ishonchli himoya qilish, ularga moliyaviy koʻmak berish, boʻyicha yangi qarorni imzoladim. Klasterlar paxta yetishtirishga oʻgʻit, urugʻ, yoqilgʻi uchun, imtiyozli kreditlarni istalgan vaqtda olish imkoniga ega boʻladi. Klasterlarga gʻoʻza navlarini mustaqil joylashtirishga, chetdan hosildor navlarni seleksiya uchun olib kelishga ruxsat berildi. Bundan tashqari, ishlab chiqarishni ilm bilan bogʻlash maqsadida, har bir klasterga paxtachilik ilmiy tashkilotlari va Agroxizmatlar markazlari biriktirilayapti”, — dedi Shavkat Mirziyoyev.
Prezident lazerli tekislagichlarni sotib olishda, ular qiymatining 30 foizi byudjetdan qoplab berilishi haqida gapirdi.
“Bundan tashqari, paxta maydonlarini nasosda sugʻorishda elektr xarajatlari 50 foizi qoplab beriladi (bunga 117 milliard soʻm, shundan vodiyga 30 milliard soʻm ajratiladi)”, — dedi davlat rahbari.
Izoh (0)