PayPal 2 ming nafar xodimini ishdan bo‘shatadi. Nega kompaniya haligacha O‘zbekistonda yo‘q?
Onlayn pul o‘tkazmalarini amalga oshiruvchi dunyodagi eng yirik kompaniya — PayPal 2 000 kishini ishdan bo‘shatishini e’lon qildi, bu kompaniya umumiy ishchi kuchining 7 foizini tashkil qiladi. Bu haqda CNBC xabar bermoqda.
-13.jpg)
PayPal veb-saytida e’lon qilingan xodimlarga yo‘llangan eslatmada PayPal prezidenti va bosh direktori Den Shulman qisqartirish qarori “juda qiyin makroiqtisodiy sharoitlar” bilan bog‘liqligini tushuntirdi.
“Kompaniya xarajat tuzilmasini boshqarish va resurslarni asosiy strategik maqsadlarga yo‘naltirishda sezilarli yutuqlarga erishdi, ammo ko‘proq narsa qilish kerak”, — deydi u.
Ishdan bo‘shatish to‘g‘risidagi e’lonni “og‘ir xabar” deb atagan Shulman, ishdan bo‘shatish kelgusi haftalarda bo‘lib o‘tishini va ketgan xodimlar yordam pullari olishlarini aytib o‘tdi.
PayPal xodimlar sonini qisqartirish haqida e’lon qilgan birinchi yirik kompaniya emas. Oxirgi bir oy ichida shunga o’xshash ko‘plab choralar e’lon qilindi.
Masalan, Microsoft 11 mingga yaqin xodimini ishdan bo‘shatishni rejalashtirmoqda. Undan avval esa Amazon 18 mingdan ortiq xodimini ishdan olishini e’lon qilgandi.
PayPal aksiyalari kompaniya rahbarining xodimlarga murojaatidan keyin 2 foizga qimmatlashgan.
PayPal nega O‘zbekistonda ishlamaydi?
O‘zbekiston — PayPal’ga ulanmagan Markaziy Osiyodagi yagona davlat hisoblanadi. Kompaniya dunyodagi eng yirik onlayn to‘lovlarni amalga oshiruvchi to‘lov tashkilotidir.
Buyuk Britaniya, Italiya, Fransiya va Germaniya kabi davlatlarda 90 foizdan oshiq onlayn to‘lovlar aynan PayPal orqali amalga oshiriladi.
PayPal’ga muhtoj o‘zbekistonliklar aylanma yo‘llardan foydalanadi — boshqa mamlakatlar, masalan, Qozog‘iston orqali ro‘yxatdan o‘tadi. Biroq bu noqulaylik tug‘diradi va tizimning cheklangan imkoniyatlaridan foydalanishga to‘g‘ri keladi.
PayPal’ning o‘zi O‘zbekistonda nega ishlamayotgani haqida hech qanday rasmiy izoh bermagan, ammo axborot texnologiyalari va kommunikatsiyalarini rivojlantirish vaziri Sherzod Shermatov bu mamlakatning yaqin o‘tmishi bilan bog‘liqligini taxmin qilgandi:
Haqiqatan ham PayPal tizimida O’zbekiston yo‘q. Bunga menimcha, O‘zbekistonda uzoq yillar davomida konvertatsiya tizimining ishlamagani va shu kabi boshqa sun’iy to‘siqlar sabab bo‘lgan deb o‘ylayman, — deydi Shermatov.
Uning so‘zlariga ko‘ra, vazirlikning Markaziy bank va Moliya vazirligi bilan birgalikdagi vazifasi O‘zbekistonni PayPal’ga kiritishdir.
Biroq O‘zbekistonda kompaniya faoliyati hanuzgacha yo‘lga qo‘yilgani yo‘q.
Sherzod Shermatov 2022-yil 5-oktabr kuni, Xalqaro press klubda yana bir bor PayPal bo‘yicha izoh berib o‘tgan edi.
Amerika—O‘zbekiston savdo palatasi va elchixona orqali ham gaplashdik. PayPal’ning o‘z biznesi dunyoda yomon ahvolda ekan. Kompaniya rahbariyatining pozitsiyasi hozir ko‘proq Amerikadagi va barcha PayPal bor bozorlardagi biznesini rivojlantirish bo‘lib, ekspansiya planlari yo‘q ekan. Mana bizga aytilgan ularning rasmiy javobi. Bizdan hech qanaqa rasmiy qo‘shimcha ma’lumot so‘ralgani yo‘q, — degandi AKT vaziri.
Avvalroq PayPal’ning O‘zbekistonda ishlamasligi bo‘yicha Markaziy bank vakillari tomonidan ham izoh berilgan edi.
Ularning so‘zlariga ko‘ra, cheklovni PayPal O‘zbekistonda biror davlat organi yoki boshqa tashkilot bilan kelishmagan, muhokama qilmagan holda mustaqil ravishda o‘rnatgan.
Markaziy bank mamlakatda WebMoney va Qiwi kabi tizimlar ishlayotganiga e’tibor qaratgan — ularga O‘zbekistonda chiqarilgan Visa, Mastercard, UnionPay yoki “MIR” kartalarini bog‘lab qo‘yish mumkin.
O‘zbekiston tomonidan hech qanday to‘siqlar yo‘q, Markaziy bank esa o‘zi qo‘ymagan cheklovlarni olib tashlay olmaydi. Qachonki PayPal O‘zbekistonda tegishli bo‘linma ochib, milliy valyuta – so‘mda to‘lovlar va amaliyotlarni amalga oshirmoqchi bo‘lsa, u holda amaldagi qonunchilikka ko‘ra, PayPal Markaziy bankdan tegishli litsenziya olishi va o‘rnatilgan tartibda nazorat va kuzatuv ostida bo‘lishi talab qilinadi, — deyiladi Markaziy bank xabarida.
